DAKBAYAN SA BUTUAN -- Ang lokal nga panggamhanan sa Agusan del Norte mipirma sa usa ka Memorandum of Understanding (MOU) kauban ang Department of Agriculture (DA)-Caraga, Mindanao Development Authority (MinDA) ug ang private seed companies alang sa conduct of vegetable derby sa probinsya.

Ang nasangpit nga MOU signing personal nga gipangunahan ni Provincial Governor Dale B. Corvera ug DA-13 Technical Director Rebecca Atega niadtong Hunyo 16 didto sa Provincial Training Center, Capitol Compound, Butuan City.

Mapasalamaton si Gobernador Dale Corvera sa mga ahensya nga misuporta sa agricultural development initiatives sa probinsya ubos sa programang AGUSAN UP!.

Pinaagi sa maong MOU, ang seed companies maoy mohatag sa kinahanglanon nga mga liso ngadto sa nagkalain-laing grupo sa mag-uuma alang sa vegetable production nga naidentify sa demonstration farms sa probinsya samtang ang DA-13 mohatag sa mga materyales nga kinahanglan alang sa nurseries ug technical interventions ug ang MinDA maoy responsable sa sourcing of prizes sa gidugayon sa derby.

Ang demonstration farm nahimutang didto sa syudad sa Cabadbaran, lungsod sa Santiago, Kitcharao ug Las Nieves.

Saksi sa maong pagpirma sila Sec. Emmanuel F. Pinol sa MinDA nga girepresentahan ni Jun Piong, Provincial Administrator Gerry Joey S. Laurito, Las Nieves Mayor Avelina S. Rosales, Provincial BoardMember Virgilio R. Escasinas, Jr., Officer-in-charge of Provincial Agriculture Office Alvin P. Aclan ug uban pang mga kawani sa nagkalain-laing ahensya.

 Ang nasangpit nga MOU signing usa sa mga tipik nga mga kalihokan sa ika-54th Araw ng Agusan del Norte. (Justine L. Perez, LGU Agusan del Norte/PIA Agusan del Norte)