DAKBAYAN SA BUTUAN -- Suportado karon sa Sangguniang Panlalawigan ang ordinansa nga gikan sa lungsod sa Nasipit, Agusan del Norte human gideklara niini nga balido ang Municipal Ordinance No. 2021-008 nga nag unod sa pag-establisar og sabungan ug  pag-regulate sa operasyon nga adunay sabong sulod sa maong lungsod.

Giluwat sa maong lungsod ang mga kinahanglanon sa mga bag-ong negosyante nga mokuha og prangkisa sa pagtukod  ug naglatag kini og mga requirements para sa pag renew sa maong cockpit. Pagpaabot sa mga General guidelines, lagda ug regulasyon, mga gibawal sulod sa sabungan ug pag imposar og mga bayrunon niini.

Mahibaloang mokabat sa Usa ka gatos ka libo (P100,000) ka pesos ang mamahimong franchise fee sa kinsa mang gusto mo operate og sabungan.

Gitugotan ang maong cockfighting sa mga lisensyadong sabungan sa adlawng domingo, legal holidays ug panahon sa fiesta. Mamahimong operatibo usab kini kung adunay ipahigayon nga municipal agricultural, commercial o industrial fairs, carnival nga dili mo lapas sa tulo ka adlaw.

Gipaabot usab nga walay ipahigayon nga sabong matag December 30 (Rizal Day), June 12 (Independence Day, November 30 (National Heroes Day), Holy Thursday, Good Friday, election o Referendum Day ug lain pang holidays nga ideklara sa National Government. 

Ubos usab sa maong ordinansa, koliktahon ang maong bayad matag soltada, singkwenta pesos (P50.00) para sa hackfight ug usa ka gatos (P100.00) sa derby.

Si kinsa mang makita sa paglapas pagahamtangan og duha ka libo ug lima ka gatos ka pesos (P2,500) o pag kansela sa permit niini ug lisensya.

Ang pag-aproba sa maong municipal ordinance pinaagi sa Sanggunian Resolution No.295-2021 sa pagpaningkamot ni Bokal James T. Reserva, tsirman sa Committee on Laws, Ethics and Good Government. (SVDeligero, LGU Agusan del Norte/PIA Agusan del Norte)