LUNGSOD NG QUEZON -- Ginanap ang Bamboo Ceremonial Planting for Germplasm Collection Project ng Palawan Research Experiment Station (PRES) ng Kagawaran ng Pagsasaka - MiMaRoPa sa Palawan Agricultural Center (PAC), Puerto Princesa City.

Layunin ng proyektong ito na makakolekta ng iba’t ibang uri o species ng kawayan na matatagpuan sa PIlipinas maging sa ibang bansa upang magamit sa mga pag-aaral at pananaliksik nang sa gayon ay lalo pang mapalawak ang kaalaman at magamit ito para sa pang ekonomiyang pakinabang at sa iba pang potensyal nito.

Ito ay makakatulong din upang mapalawig ang adhikain ng pamahalaan na mapanatili at mapangalagaan ang likas yaman ng ating lupain at kapaligiran. Maaari din itong magsilbing resource house for propagation at genebank o library ng bamboo collections.

Ang Bamboo Ceremonial Planting activity ay pinangunahan ng DA MIMAROPA Regional Executive Director, Antonio G. Gerundio, Regional Technical Director, Engr. Elmer T. Ferry, RTD for Operations at DA-PRES Agricultural Center Chief III, Librada L. Fuertes. Nakipagkaisa din at nagbigay ng kanilang mensahe sa aktibidad na ito ang mga lider mula sa grupo ng Bambusa Princesa at iba't ibang ahensya ng Pamahalaang Lungsod ng Puerto Princesa na sumusulong ng Bamboo Industry Development Program.

Sa kanyang pagbibigay ng update, sinabi ng City Agriculturist, Melissa U. Macasaet na ang Lungsod ng Puerto Princesa ay may mga sinisimulan ng  mga gawain upang mabalangkas ang Bamboo Development Roadmap na magiging gabay nila upang matagumpay na maisulong ang Bamboo Industry sa Lungsod. Sa tulong din ng USAID Surge ay may mga isinasagawang mga virtual na pagsasanay patungkol sa kawayan.

Ayon sa City ENRO, Atty. Carlo Gomez, napakahalaga ng proyektong ito para sa environmental protection. Saad niya “Kami po sa City Enro ay lubos na sumusuporta dahil sa proteksyon na maibibigay at tulong sa ating taong bayan”.

Ang makabuluhang  mensahe naman ni Dr. Carlos Fernandez, dating DA Undersecretary ay nakatuon sa pakinabang ng susunod na henerasyon.

Ayon naman sa Regional Executive Director (RED), Antonio G. Gerundio, ang proyektong ito  ay katuparan ng direktiba ng Kalihim ng Kagawaran ng Pagsasaka, William D. Dar. Dahil sa maraming pakinabang ang bamboo sa ekonomiya katulad ng fuel, furniture, textile, pagkain at iba pa ay marapat lamang na simulan na ang proyektong ito para sa ikauunlad ng mga magsasaka. Dagdag pa ni RED kailangan malinaw ang patutunguhan ng proyektong ito sa pagbibigay proteksyon sa environment at pagtulong sa ating mga magsasaka nang naaayon sa road map.

Sinabi naman ni RTD Elmer Ferry, "na patuloy tayong magsama-sama upang maging matagumpay ang proyektong ito upang makamit natin ang mataas na ani at mataas na kita”.

Bilang pangwakas na pahayag, sinabi ni Vice Mayor, Hon. Maria Nancy M. Socrates na ang Pamahalaang Lungsod ng Puerto Princesa ay lubos na nagpapasalamat  sa Kagawaran ng Pagsasaka sa simulaing ito na nagkaroon ng bamboo project sapagkat malaki ang maitutulong nito sa Lungsod ng Puerto Princesa. (DA-RFO IVB/RAFIS)