DAKBAYAN SA BUTUAN -- Sunod sa gisaad ni Kong. Angel Amante Matba ug Gob. Dale B. Corvera sa probinsya sa Agusan del Norte sa ilang pag-adto sa lugar sa milabay’ng semana nga atimanon ang mga naay sakit sa Sitio Casagayan, Pangaylan, Santiago, Agusan del Norte, giadtoan kini og balik sa mga medical personnel sa probinsya alang sa usa ka medical mission.

Sa pagpanguna ni Dr. Odelio Ferrer, ang hepe sa Provincial Health Office (PHO), mosuma sa 10 ang gipailawom sa minor surgeries, 25 ang nagpahimulos og dental services, 22 ang miagi og pap smear, 51 ang nagpa-sugar test, 50 ang nagpatuli ug ubay-ubay nga nagpa-check up.

Anaa usab sa 100 ang nahatagan sa PHO og mosquito net aron malikay sa mga sakit nga dala sa lamok.

Nakapadangat usab ang Provincial Social Welfare and Development Office (PSWDO) ubos sa provincial officer niini nga si Silver Joy Tejano og 50 ka eyeglasess.

Sa kinatibuk-an 550 tanan ka mga residente ning usa sa mga hilit nga sitio sa probinsya ang nakapahimulos sa maong kalihukan, apil na ang gipadangat nga food packs, nga kabahin gihapon sa immersion o “AguSerbisyo” ubos sa Amomang Agusanon Flagship Program sa AGUSAN UP!, ang kampanya sa pagpalambo sa administrasyon ni Gob. Corvera kaabag ang buhatan ni Kong. Amante-Matba.

Ubay-ubay na ang mga hilit nga sitio ang napaabtan sa maong mga serbisyo sugod sa milabay’ng tuig ug magpadayon kini sumala pa ni Provincial Administrator Gerry Joey S. Laurito, representante ni Gob. Corvera, sa maong kalihukan.

“Serbisyo nga kinasing-kasing gyod ang mahatagan mi og pagtagad,” kini ang nasulti ni Maricel Taan, usa sa mga residente sa Casagayan sa maong serbisyo nga gipaabot gyod nila Gob. Corvera ug Kong. Amante-Matba bisan sa kalayo sa ilang lugar.

Sama usab sa gipadayag ni Barangay Captain Roy S. Porogoy sa personal nga pagbisita sa duha ka dagkung lider sa probinsya sa milabay’ng semana, mapasalamaton kaayo siya sa saad nga ilang gituman.

“Isip usa ka Barangay Captain daku ang akong kalipay ug pasalamat kang Kongw. Angel Amante-Matba ug kang Gob. Dale B. Corvera nga gitagaan mi nila og pagtagad ilabina sa akong hangyo nga matagaan mi og bugas ug sa gipadala nga mga Doctor alang sa pag medical sa mga masakiton,” sumala ni Brgy. Capt. Porogoy.

Apil usab sa mitabang nga mapadangat ang nahisgutang mga serbisyo mao ang Provincial Engineering Office, mga kapulisan nga gi pangulohan ni PCol. Martin M. Gamba, kaabag ang Clan leader o chairman sa Mamanwa Manobo Farmers Association [MMFA] sa Sitio Casagayan nga si Datu Layson Sandag, mga sakop sa 29th Infantry Battalion, sa First Battalion PNP Special Action Force, barangay officials ug mga magtutudlo sa eskuwelahan sa Casagayan. (Shena Mae Pabia ug Arnfe Flores, LGU Agusan del Norte/PIA Agusan del Norte)