DAKBAYAN SA BUTUAN -- Nagpadayon ang site validation alang sa proyektong “Vegetable Derby” nga gipasiugdahan sa probinsya sa sa Agusan del Norte pagpanguna sa buhatan sa Provincial Agriculture Office (PAO).

Ubos sa derby i-develop sa apil sa indigay ang labing ubos usa ka ektarya nga luna nga tamnan og 10 ka klase nga gulay.

Ang maong indigay giapilan sa upat ka lungsod nga girepresentahan sa mosunod nga mga sites: Brgy. Kauswagan sa syudad sa Cabadbaran; Brgy. Tagbuyacan sa Santiago; Sitio Zapanta Valley sa Kitcharao, ug; Brgy. Lingayao sa Las Nieves.

Ang kalihukan gisugdan niadtong Abril ug kamulo na ang mga Technical Working Group sa pag-monitor sa vegetable production sa mga nasangpit nga sites.

Tumong sa pagpahigayon og vegetable derby nga ma-improve pa ang sistema sa vegetable production sa probinsya, mapalambo pa ang mga proyektong sama sa gulayan sa paaralan/tahanan, demo farms, provision of tools and inputs ug uban pa.

Gipunting usab sa maong indigay nga maka-impluwensya pa sa mga mag-uuma aron madugangan pa ang ilang existing crops aron mapalambo pa ang ilang panginabuhian.

Ang pagpahiluna og mga gulayan kabahin sa Food Security Enhancement Project sa AGUSAN UP!, ang  kampanya sa pagpalambo sa administrasyon ni Gob. Dale B. Corvera kaabag ang buhatan ni Kongw. Angel Amante-Matba nga gitutokan sa PAO.  

Kabahin usab kini sa proyektong “Food Basket”, usa sa mga Core Processing Projects sa Process! Process! Process! Project ubos sa AGUSAN UP!

Nagpunting ang “Food Basket” nga matamnan ang 500 ektaryas nga gulayan sa tibuok probinsya hangtud sa tuig 2027 ug makamugna og vegetable processing activities sa lungsod sa Kitcharao sulod sa maong higayon.

Kuyog sa maong site validation ang mga personahe sa Mindanao Development Authority kon MinDA.

Kaabag usab sa maong proyekto ang buhatan sa Department of Agriculture [DA] -Region, Municipal Agriculture Offices, ubang mga ahensya sa gobyerno ug mga vegetable seeds companies. (Shena Mae Pabia ug Jim Rasonabe, LGU Agusan del Norte/PIA Agusan del Norte)