DAKBAYAN SA BUTUAN -- Gilunsad sa pagpanguna nila ni Gob. Dale B. Corvera ug Kongw. Angel Amante-Matba ang “Adopt a Barangay Project” sa Agusan del Norte Police Provincial Office (ADNPPO) Technical Working Group (TWG) ug Provincial Advisory Council [PAC] sa Barangay Jaguimitan, Nasipit, Agusan del Norte.

Ang “Adopt a Barangay Project” gidesinyo sunod sa enterprise village concept diin ang nagkalain-laing programa ug proyekto sa nagkalain-laing buhatan gipadangat alang sa mga residente sa Geographically Isolated and Disadvantaged Areas [GIDAs]. 

Inisyatiba kini sa ADNPPO sa pagpanguna ni PCol. Martin Gamba ug ni Board Member Dick Carmona, ang chairperson sa Provincial Advisory Council (PAC).  

Ang Barangay Jaguimitan nga naay 5,882 ka lumulupyo, usa sa mga na-classify nga GIDA ug priority barangay usab subay sa Executive Order 70 ug tungod niini napili kini nga lunsaran sa maong proyekto.

Sa bahin sa probinsya, gilunsad sa maong okasyon sa administrasyon ni Gob. Corvera ang Php118 milyones nga upgrading/improvement sa Culit-Pag-ao-Jaguimitan Provincial Road, proyekto nga gisugdan ni kanhi Gob. Angel Amante-Matba nga kongresista sa ikaduhang distrito sa probinsya na karon. 

Ug laing proyekto nga apil sa P20 milyones nga Local Government Support Fund-Support to Barangay Development Program (LGSF-SBDP) ubos sa National Task Force-Ending Local Communist Armed Conflict (NTF-ELCAC). Ang Barangay Jaguimitan usa sa 33 ka barangay nga apil sa Insurgency Cleared Barangay sa probinsya.

Sa bahin sa Provincial Advisory Council ubos ni Board Member Dick Carmona isip chairman nang-apod apod kini og 48 ka sako nga bugas sa mga residente sa maong okasyon.

Nagpadangat usab ang nagkalain-laing ahensya sa ilang mga serbisyo isib kabahin sa proyekto. Apil niini ang pagbansay nga gihimo sa Technical Education and Skills Development Authority (TESDA) Agusan del Norte kansang 166 ka trainees nga migradwar gipasidunggan sa maong okasyon. 

Giturn-over usab sa Department of Agriculture (DA) ang 200-Free Range Chicken, grower feeds, two boxes of electrogen, 323 packs of assorted vegetable seeds ug livelihood tools.  

Sa bahin sa ADNPPO, nagpadangat kini og mga hygiene kits ug faceshields.

Nagpadangat usab ang Central Butuan Rotary Club og foodpacks sa mga lumulupyo.

Sa iyang mensahe, giawhag ni Gob. Corvera nga padayong maghiusa aron padayong mapadangat ang serbisyo sa mga nagkadaiyang lokal o nasyonal nga buhatan.

“Kung wala kamo nagka hiusa, dili moabot ang kalinaw sa inyong barangay… that is a sign that this barangay is a united barangay,” sumala sa gobernador.

“Nindot ni tan-awon mga kaigsoonan nga naa ang suporta sa private sector ug sa goberno gihiusa gyod nato aron moabot gyod diri,” padayon sa gobernador.

Atol sa pagpirma sa Pledge of Commitment sa paghiusa sa nagkadaiyang ahensya sa gobyerno gipadayag ni Kongw. Amante-Matba ang iyang commitment nga mopadangat og serbisyo apan gihagit usab niya ang mga lumulupyo sa barangay nga gamiton ang kahanas ug kaalam nga ilang nakat-onan pagpalambo sa mga oportunidad nga motumaw tungod sa mga serbisyo sa gobyerno. 

“Kining (among) gipirmahan, amo ning kontrata sa inyo. Kontrata namo sa inyo nga ang goberno motabang… dili lang sa hatag.  Tama si Gob. Dale, motabang sa inyo pinaagi sa oportunidad… depende na karon sa inyo kung gamiton ba ninyo ang inyong nahibaw-an nga kaalam…” 

Isip tubag sa mensahe nila ni Gob. Corvera ug Kongw. Amante Matba, gipadayag ni Barangay Jaguimitan Captain Ireneo Lauro nga daku og potential sa farm products ang Jaguimitan isip oportunidad alang sa mga lumulupyo. 

Dugang ni Kapitan Lauro nga usa sa kalisud nga nasinatian sa mga nag-uuma ug mga residente mao pag transport mga produkto ngadto sa merkado ug dakung tabang ang improvement sa kalsada nga gihimo sa probinsya.

“Sa habal-habal namo nga transportation mag ihap mi ika pila kaha mi matumba ika duha, tulo o upat … So karon, nakita namo (nga) maayo na kaayo pag-transport sa among products,” pahayag ni Lauro kalabot sa improvement sa kalsada nga gipunting nga mahuman sa Oktubre ning tuiga.

“Pasalamat ko sa Kongresista (Congw. Angel Amante-Matba), ni Governor Dale Corvera”, sumala ni Kapitan Lauro.  

“Dili matukib sa pulong ang akong pagpasalamat nga (kining) pinakadaku nga event gipahigayon, ang “Adopt a Barangay Project.”

Ang lain nga nanambong sa maong okasyon mao sila si Regional Dir. Abel James Monteagudo sa Deprtment of Agriculture-Caraga, RD Tarhata S. Mapandi sa TESDA-Caraga, PBGEN Romeo M. Caramat, Jr. sa Police Regional Office 13, COL Adonis Ariel Orio sa 402nd Brigade, 23IB, Nasipit Mayor Enrico Corvera represented by SB Felipe Abigan, Jr., PD Ellen Vee Chua sa DILG-ADN, PD Rey Cueva sa TESDA ADN, Provincial Administrator Gerry Joey Laurito, ug mga opisyales sa barangay Jaguimitan.

Ang “Adopt a Barangay Project” gisuportahan usab sa mga sakop sa pribadong sektor. Apil kanila mao ang Central Butuan Rotary Club, The Fraternal Order of Eagles, Provincial Advisory Council, Alsa Bisaya Association, Youth for Development and Change, Prycegas ug Buenavista Gay Association. (Shean Mae Pabia ug Sonny Montilla, LGU Agusan del Norte/PIA Agusan del Norte)