DAKBAYAN SA BUTUAN -- Ang lokal na kaggamhanan sa San Francisco, Agusan del Sur uban sa suporta sa buhatan sa Commission on Population and Development (POPCOM) - Caraga, nagpahigayon bag-ohay pa lamang og usa ka adlaw nga kalihokan mahitungod sa pagtaod ug pagtanggal sa progesterone subdermal implants (PSI) isip pagsaulog sa National Family Planning (FP) Month.

Ang nasangpit nga kalihokan maglangkob sa kinatibuk-an, kahinungdanon, ug mga kaayohan sa pagplano sa pamilya, hilabi na sa pagpili sa PSI nga modern FP method. 

Sa mga gikataho nga gisumite sa rehiyonal nga buhatan, adunay 1,948 nga mga magtiayon ug mga kababainhan nga anaa sa reproductive age nga naay unmet need ang nahatagan og serbisyo alang sa unang semester. Diin, adunay 362 sa ilaha ang mipili nga gamiton ug gihatagan serbisyo sa PSI. Adunay usa ka 14.19% nga pagtaas sa paggamit sa mga subdermal implant kauban ang uban pang mga modernong pamaagi sa family planning. 

Nagpamatuod kini nga daghang mga magtiayon ug babaye nga naa sa reproductive age nagbalhin sa paggamit sa PSI, tungod usa kini sa labing epektibo nga pamaagi sa moderno nga pagplano sa pamilya.

Malaumon ang POPCOM Caraga nga pinaagi sa kining kalihokan, daghan pa nga mga magtiayon ug babaye nga anaa sa reproductive age ang madasig sa pagbalhin ug paggamit sa pamaagi sa pagplano sa pamilya ug mupalig-on sa kapasidad sa matag pamilya, indibidwal, ug komunidad aron sa pagkab-ot sa haruhay ug hapsay nga pamuyo. 

Padayon ang rehiyonal nga ahensya naghatud sa mga programa ug serbisyo sa Responsible Parenthood and Family Planning (RPFP) kauban ang mga LGUs sa ilang mga komunidad aron makab-ot ang katuyoan sa ahensya. (Charina May L. Lagunde, RPFP Technical Assistant, POPCOM-Caraga/PIA-Agusan del Sur)