DAKBAYAN SA BUTUAN -- “Lahi ang Matingue.”

Kini ang obserbasyon sa mga sakop sa services delivery team sa “AguSerbisyo” sa giadtoan niining laing hilit nga komunidad – Sitio Matingue, Barangay 1, Santiago, Agusan del Norte – aron ipadangat ang sosyo-ekonomikanhong mga serbisyo.

Luyo sa pagdawat nila sa mga sosyo-ekonomikanhong hinabang, gipakita usab sa mga residente nga takus sila sa pagbarug sa ilang kaugalingon sa ngadto-ngadto pinaagi sa paghimo nila og “Agri-Fair” o ang pagpamaligya sa abot sa ilang uma aron mapalit sa mga bisita.

“Sa karon saging (pinakakusog) ug mamaligya mi og gulay (assorted vegetables), kada semana mi mag harvest… kada miyembro naay area (uma) nga ato gyong makita,” sumala ni Glenn Ariston, ang presidente sa United Small Farmers Association [USFA], ang organisasyon sa mga mag-uuma sa Matingue.

Ang USFA 16 na ka-tuig ug adunay 210 ka miyembro. 

Sa karon, dugang ni Ariston, ang labing kusog nila nga farm products mao ang saging, cacao ug gulay. Naila usab ang Santiago nga daghang abaka.

Mismo si Gob. Dale B. Corvera nga nanguna sa services delivery team kauban si Kongw. Angel Amante-Matba nakadayeg usab sa iyang nakita.

Gawas sa naobserbahan niyang kalinaw, nakita usab niya ang kakugi sa mga lumulupyo niini base sa nakita niya sa palibot samtang nagbiyahe siya padulong sa Sitio Matingue.

“Nalipay ko sa akong nakita tungod kay una, akong nakita nga daku kaayo mo og potential diri sa agrikultura… ug nakita nako nga ang mga tawo dinhi naay kakugi. Ngano man? Naa moy mga tanum, nakalabay mi didto og cacao-an,” matud ni Gob. Corvera.

Ang samang potensyal ang nag-aghat kang Gob. Corvera sa pagpadagan sa AGUSAN UP!, kampanya sa pagpalambo sa iyang administrasyon kaabag ang buhatan ni Kongw. Amante-Matba.

Ubos sa AGUSAN UP! ang mga magkaluhang proyektong Plant! Plant! Plant! ug Process! Process! Process! Ug subay sa kaabunda sa saging sa lungsod, ang Banana Processing Center ang mahimong Core Processing Project sa lungsod sa Santiago.

Niini, mahimong usa ang Sitio Matingue nga sandigan sa proyekto nga mosuplay og saging ingon man ang uban pang produkto sa uma.

Subay niini nga kampanya sa pagpalambo gisaad ni Gob. Corvera sa mga lumulupypo nga hatagan og dugang suporta nga maka-sustenir sa ilang mga panginahanglanon ilabina diha sa pagpanguma.

“Kinahanglan tagaan og igo-igo nga suporta sa atong gobyerno aron pa gyod kamo masibot pagpaninguha nga makahimo kamo og kapanginabuhian ninyo ug gani man ang inyong mga produkto mabaligya pa ninyo sa laing dapit,” sumala sa gobernador.

Butyag ni Ariston nga ubay-ubay usab ang natampo nga mga semilya ang Agusan Up Coordinating Center.

Mahinumdoman nga bag-o lang nahatdan ang USFA og mga semilya sa cacao ug abaca, usa sa mga suporta ubos sa Plant! Plant! Plant! Mosunod pa niini ang semilya sa saging. 

“Daku kaayo og tabang para sa amo, kay sama sa cacao nga ilang nahatag karon, (ang nahatag sa una pa) dagko na, tag-as na, hapit na namunga, ang uban namunga na. Unya karon naa na pod mi abaca fiber,” matod ni Ariston.

Ubos sa Plant! Plant! Plant! gipunting sa probinsya nga nakatanum sa 125,000 ektaryas nga kaumahan sa probinsya sa mosunod nga pito ka tuig o hangtud sa tuig 2027.

Sa okasyon sa “AguSerbisyo” usab gihimo ang ribbon cutting and blessing sa USFA Office sa Sitio Matingue, ilhanan nga hiniusang makabarug na ang organisasyon alang sa mas daku pang mga responsibilidad sa pagpalambo sa kinabuhi sa mga sakop niini ug pagpauswag ning usa sa hilit nga komunidad sa Agusan del Norte. (Shena Mae Pabia, mga hulagway kuha ni Reymar Reyes ug Ydheil Zagado, LGU Agusan del Norte/PIA Agusan del Norte)