DAKBAYAN SA BUTUAN -- Plano sa lokal nga panggamhanan sa syudad sa Cabadbaran ang Public Utility Vehicle (PUV) modernization aron maminusan ang gidaghanon sa mga traysikol nga nagbiyahe sa sulud sa syudad ug mapagaan ang kahuot sa trapiko.

Ubos sa Section 3 sa City ordinance No. 2020-007, nga gipangamahanan ni Sangguniang Panlungsod Member Abner P. Caga-anan, alang sa kahamugaway sa publiko ug sa interes sa kaangayan, kalinaw, kahusay, ug kahilwasan, ang pag-isyu sa Mayors Permit, Business License, Provisional Authority, o prangkisa sa pagpadagan sa tricycle-for-hire, lemitado lang sa One Thousand Seven Hundred Fifty (1,750) nga yunit sa "waril-warik" nga mga traysikol ra. Walay application alang sa bag-ong mga prangkisa ang dawaton sugod Enero 1, 2022 bisan pa ang kinatibuk-ang ihap sa mga prangkisa sa pagpadagan sa motorized tricyle mas gamay sa 1,750.

Aron hapsay ang implementasyon gi-aprobahan sa Sangguniang Panlalawigan sa Agusan del Norte ang City Ordinance No. 2020-007 gikan sa Sangguniang Panlungsod sa Cabadbaran, ang “Ordinance Imposing Moratorium of Issuance of Franchise to New Applicant for Motorized Tricycles (Warik-Warik)”.

Ang mga silot sa paglapas sa maong ordinansa diin mga traysikol mobyahe nga walay prangkisa mao ang mosunod: Unang paglapas Duha ka libo ka pesos (Php2,000.00) ug ang ikaduha ug sunod nga paglapas Duha ka libo ug lima ka gatos ka pesos o pagkabilanggo nga dili molapas sa tulo (3) ka bulan sa pagbuot sa korte.

Kini giaprobahan niadtong ika 109th regular session kaniadtong October 4, 2021 sa pagpangamahan ni Provincial Board Member Erwin L. Dano, tsirman sa Committee on Energy and Transportation. (Jessica O. Mellejor, LGU Agusan del Norte/PIA Agusan del Norte)