DATU ODIN SINSUAT Da, Maguindanao -- “Matagal na namin po itong inaasam na sana makapasok dito ang mga nagbabakuna kasi kailangan namin na ma-vaccine kami para mailigtas namin ang sarili namin, ang pamilya namin, at ang komunidad namin.”
Ito ang pahayag ni Rudy Laguiano, miyembro ng Moro Islamic Liberation Front Bangsamoro Islamic Armed Forces (MILF-BIAF) 104th base command na nabakunahan na noong Nobyembre 11 kontra COVID-19 nang puntahan ng Rural Health Unit (RHU) ng Datu Odin Sinsuat (DOS) sa Maguindanao ang liblib na barangay ng Kinebeka na sakop ng Camp Badre, isa sa kampo ng MILF na kinikilala ng pamahalaang nasyonal.
Sa pakikipag-ugnayan ng Office of the Presidential Adviser on the Peace Process (OPAPP) sa Ministry of Health (MOH) ng Bangsamoro Autonomous Region in Muslim Mindanao (BARMM), ay sinimulan na ang pagbabakuna laban sa COVID-19 sa mga liblib na komunidad ng MILF bilang bahagi ng na rin ng Social Development planning domain ng Camps Transformation Plan (CTP) para sa MILF communities.
“Pasalamat kami sa kanila (health workers) kasi kung sa ibang lugar (magpabakuna), sa regional, mahirapan tayo doon kasi masikip ang pila doon, kaya maraming maraming salamat sa mga tagapagbakuna,” ani ni Laguiano.
Sa kasalukuyan, umabot na sa 224 ang nababakunahan sa mga MILF communities at inaasahang madadagdagan pa ang bilang na ito sa mga susunod na araw.
Kabilang dito ang 105 na residente sa Brgy. Kinebeka, DOS Maguindanao, 59 katao sa Guindulungan na bahagi ng ng Camp Badre.
Samantala, 60 katao naman ang nababakunahan na sa munisipalidad ng Barira na parte naman ng Camp Abubakar. Nakatakda ring magsagawa ng ResBakuna vaccination drive sa Camp Rajamuda sa North Cotabato sa mga susunod na araw.
Tiniyak ni RHU DOS nurse Shaida Kimamao Abdul na walang dapat na ikabahala ang mga miyembro ng komunidad dahil hindi sila basta-bastang tuturukan ng bakuna.
Paliwanag niya, ang bawat tao ay sasailalim sa pre-health screening at counselling. Kailangan din sila magbigay ng pahintulot o consent bago sila mabakunahan laban sa COVID-19.
“Actually akala nila na (tulad) ‘yung nakikita nila na parang sa bata lang na pagdating sa pasilidad, bakuna kaagad after interview. Sa ResBakuna natin, dadaan pa tayo sa ilang hakbang bago mabakunahan,” paliwanag ni Abdul.
“Ngayon may doktor talaga tayo na pumunta dito in the person of Dra. Abdulkarim. So kasama natin sya para mag screen ng mga kapatid natin na MILF. So hindi po basta basta na pag-upo mo agad ‘dyan, babakunahan ka na. Talagang i-screen ka pa kung qualified ka talaga na bakunahan sa araw na ito,” dagdag pa niya.
Kabilang din sa ResBakuna team si Dr. Baimoma D. Abdulkarim, medical specialist mula sa DOS District Hospital sa isinagawang vaccination drive sa Brgy. Kinebeka sa DOS.

Ayon kay Kashmir Mohammad, Joint Task Forces on Camps Transformation (JTFCT) MILF focal person ng Camp Badre, bagamat kanilang prayoridad na mabakunahan ang mga miyembro ng MILF-BIAF, ay bukas din umano ang vaccination drive para sa mga iba pang miyembro ng komunidad.
Sa katunayan, ay kasama ang mga katutubong Teduray na nabakunahan sa araw na iyon.

“Sa mga kasamahan namin sa BIAF at mga komunidad, kailangan magpabakuna na tayo, wag tayo matakot dahil ito ay para sa atin para sa karamihan,” panawagan ni Mohammad.
Para naman kay Kaharudin Guiamad Sipe, miyembro ng MILF-BIAF na nakatakdang i-dekomisyon ngayong ikatlong yugto ng decommissioning, tiwala siya na ang pagpapabakuna laban sa COVID-19 ay makakabuti para sa kanya at sa kanyang komunidad.

“Dahil sa pagtitiwala namin, dahil wala kaming alam dyan (sa Siyensiya) pero alam namin na hindi nila gagawin ito kung hindi makakabuti. Sa Allah tayo nagtitiwala na hindi magkakaroon ng bakuna kung hindi makakabuti,” pahayag niya.

Ayon sa RHU DOS, sa kanilang pagbabalik sa komunidad para ibigay ang second dose ng bakuna, ay handa din silang magbigay ng first dose para sa iba pang miyembro ng pamilya ng MILF BIAF combatants.

Nauna nang sinabi ni MOH BARMM Minister Dr. Bashary Latiph na handa ang MOH na magbakuna laban sa COVID-19 sa mga miyembro ng MILF-BIAF bilang proteksyon sa kanilang sarili at mga pamilya. (OPAPP)