DAKBAYAN SA BUTUAN -- “Ang NANIE kun Nasipit Agusan del Norte Industrial Estate ma-develop na gyod… Ania na makita na nato,” kini ang puno sa kadasig nga nabungat nga pahayag ni Gob. Dale B. Corvera sa Agusan del Norte kaniadtong Oktubre 1, sa pag-abli niya sa diskusyon tali sa municipal nga panggamhanan sa Nasipit ug mga opisyal sa Philippine Economic Zone Authority (PEZA) aron iplastar ang mahimong Usufruct Agreement sa pagpalambo sa NANIE sa Watergate Pavilion Hotel ning dakbayan.

Giproklamar isip usa ka Special Economic Zone niadtong Disyembre 1998, o dul-an sa 23 ka tuig na ang milabay, kinahanglan pa gyod ang plastadong pagpalambo ning maong ekonomikanhong pasilidad nga nauyonan sa Regional Development Council sa Caraga nga mahimong sentro unya sa agri-processing activities sa rehiyon.

Alang kang Gob. Corvera magsilbi kining mitsa sa pagdaghan unya sa processing activities ug paglambo sa mga kalambigit niining mga negosyo sa gitawag nga value chain gikan sa produksyon sa uma alang sa mga hilaw nga materylaes nga ibahug ngadto na sa pagpamaligya ingon man ang suportang mga serbisyo pagpahitabo sa maong mga ekonomikanhong kalihukan. 

Tungod sa gilantawng mahitabo isip resulta sa NANIE naaninaw usab ni Gob. Corvera nga usa kini sa mahimong yawe pagmugna og libuang trabaho nga gikinahanglan sa probinsya, pag-angat sa kita sa mga lumulupyo niini ug pagkab-ot sa gipaningkamotan sa matag Agusanon nga makatagbaw nga kahimtang sa pagpuyo.

Ang maong panglantaw sa gobernador ang nagdugso kaniya sa paglunsad sa AGUSAN UP!, ang kampanya sa pagpalambo sa iyang administrasyon. Kaabag ang buhatan ni Kong. Angel M. Amante-Matba, gipursige sa ekonomikanhong aspeto maong kampanya ang pagpakusog sa pagpananum sa mga underutilized o kaha bakanteng kayutaan sa probinsya ug pagpahiluna nga naay mosawo nga processing activities sa mahimong ani unya ubos sa magkaluhang proyekto sa Plant! Plant! Plant! ug Process! Process! Process o ang programang Plant and Process for Prosperity.

Ubos sa Process! Process! Process! 15 ka Core Processing Projects ang gitutokan karon pagpahiluna sa AGUSAN UP! Coordinating Center. Apil sa 15 ka Core Processing Projects ang NANIE ug tungod sa kadaku sa mahimong kutay niini sa ubang mga proyekto ug impact alang sa pagtumaw sa mas daghan pang negosyo, prayoridad gyod ang NANIE. 

Subay sa nahisgutang kamahinungdanon sa NANIE, masabtan ang gipakitang di matukib nga kadasig ni Gob. Corvera sa maong okasyon.

Gipaambit usab sa gobernador ang paningkamot sa iyang administrasyon, sa buhatan ni Kong. Amante-Matba ug munisipyo sa Nasipit nga alang kaniya naghimo sa maong okasyon nga usa gyod ka “memorable day”.

“Naay mga inisyatiba nga gihimo ang probinsya para gyod mapukaw ang natulog nga NANIE,” paambit ni Gob Corvera. "Daghan mga meetings nga gihimo locally hangtud nga nagbuo ta og usa ka team together with Congw. Angel (Amante-Matba)… uban si Mayor (Enrico) Corvera.” 

“Ug didto nako nakita nga at the end of the tunnel dunay siga nga kung imong huypon mahimong dakung kalayo,” panapos sa gobernador isip pasumbingay sa oportunidad nga dala sa suporta sa PEZA. 

Sa diskusyon nahisgutan ang paghatag sa munisipyo og katungod sa PEZA, nga girepresentahan ni Director General Charito B. Plaza sa maong panagsabot, nga ipahigayon ang pag-develop sa kapin sa 62 ektaryas nga proklamadong special economic zone sa kondisyon nga naay 12% management fee ang PEZA gikan sa mahimong kita unya.

Dugang nahisgutan nga molungtad ang maong kasabutan sa 25 ka tuig ug renewable sa duha ka higayon apan dili molapas sa 75 ka tuig.   

Sa panaghisgut, migawas nga nakaposisyon na ang kompanyang Aboitiz nga magsilbing partner nga developer sa PEZA.  

Ang ubang detalye hisgutan sa mosunod nga mga adlaw hangtud nga magkasabot ang Lungsod sa Nasipit ug PEZA.

Sa samang higayon hisgutan usab sa Lungsod sa Nasipit ug Probinsya sa Agusan del Norte ang mahimong bahinay nila sa mahimong revenues gikan sa NANIE subay sa nahimo sa matag usa sa miagi ug papel unya, apil na niini ang pag-promote sa proyekto sa posibleng locator, paghatag og mga insentibo ug uban pang mga serbisyo unya. 

Ang panagtigum gitambungan usab nila Ruth Jugao isip representante ni Congw. Angel Amante-Matba, Provincial Administrator Gerry Joey Laurito, Regional Executive Dir. Nonito Tamayo sa DENR, Provincial Director Brenda Corvera sa DTI, Provincial Board Members, Provincial Chief of Offices, Agusan Up Coordinating Center ug Municipal Officials sa Nasipit. (Shena Mae Pabia, Sonny Montilla ug Reymar Reyes, LGU Agusan del Norte/PIA Agusan del Norte)