DAKBAYAN SA BUTUAN -- Gi-turnover sa probinsyal nga panggamhanan sa Agusan del Norte niadtong Nobyembre 26 ang duha ka unit nga grain dryers ngadto sa Maningalao-Lingayao Agriculture Cooperative (MALICO) sa Purok 3, Lingayao, sa Las Nieves.
Nagkantidad ang maong mga himan sa mosuma sa P3.5 milyones.
Gipundohan usab sa municipal nga panggamhanan sa Las Nieves ang nagkanditad og Php3.2 milyones nga multi-purpose building ug ang galastuhan sa installation giako sa Agusan del Norte Electric Cooperative (ANECO).
Ang paghatag sa mga ekwipo ug suporta ngadto sa mga mag uuma kalabot sa pag amoma ubos sa progamang Food Security Enhancement sa AGUSAN UP!, ang kampanya sa pagpalambo sa administrasyon ni Gov. Dale B. Corvera kaabag ang buhatan ni Kongresista Angel Amante-Matba.
Gipatuman ang maong proyekto sa Provincial Agriculuture Office (PAO).
Kini gihimo isip tabang sa dugay na gipangandoy sa mga mag-uuma sa Las Nieves nga mas mapadali ang ilang proseso ug produksyon sa mais ug humay ilabina diha sa mas mapadali ang pagpauga niini.
“Ing-ana ka dako og tabang sa ila… Kini nga dryer pinaka importante gyud ni siya, tungod kay panahon nga ting ulan ang mga farmers dili na maglisod sa pag pauga sa ilang mga produkto sama sa mais ug humay” sumala ni Miguelito D. Velasco, ang Provincial Corn Coordinator sa PAO.
Sumpay ni Velasco nga napili ang maong kooperatiba tungod sa tibuok probinsya kini nga grupo ang unang nahimong cluster ug pasar sa qualifications, lakip niini ang kadak-on ug kalapdon sa ka-maisan/humayan nga nag produce og dako nga volume sa probinsya sa Agusan del Norte.
Ang MALICO adunay duha ka organisasyon nga mosuma sa kapin kon kulang 160 ka miyembro.
Gitambungan ang maong okasyon ni Provincial Administrator Gerry Joey S. Laurito isip representante ni Governor Dale B. Corvera, Provincial Agriculturist Alvin Aclan, Board Member Vergilio R. Escasiñas isip Chairman sa Committee on Agriculture, Mayor Avelina S. Rosales, Barangay Lingayao Captain Hon. Ramon Olor, Sr., SP members, mga personahe sa Department of Agriculture (DA) ug ANECO ug Agricultural Training Institute (ATI). (Shena Mae Pabia ug Anthony Antoquia, LGU-Agusan del Norte/PIA-Agusan del Norte)
