DAKBAYAN SA BUTUAN -- Laing hilit nga sitio sa probinsya sa Agusan del Norte ang gibisitahan sa mga personahe sa probinsyal nga panggamhanan aron ipahigayon ang “Field Based Investigation and Site Validation/Survey” alang sa himoong Housing Project ug Patubig, Sitio Linao-linao, Lower Olave, Buenavista, Agusan del Norte.
Tuyo sa maong kalihukan nga makuha ang pagtugot sa mga IPs sa Sitio Linao-linao nga mabutangan og mga proyektong ‘Housing Project’ nga gikan sa probinsyal nga pangamhanan ug patubig gikan sa pribadong sector, particular sa Newry Airsoft Skirmishers Association [NASA].
Ang pagkuha og pagtugot sa IP subay sa National Commission on Indigenous Peoples (NCIP) Administrative III Series of 2012.
Ang Sitio Linao-linao naay kalay-on nga 19.7 kilometros gikan sa Barangay Hall sa Lower Olave. Naay 54 ka banay sa Indigenous People [IPs] ang nagpuyo niini. Nasulod ang maong sitio sa CADT 252.
Sa panaghisgut nga gihimo, gipasabot sa NCIP ang panginahanglan sa pagtugot sa mga lumulupyo aron mabutangan og housing project ug uban pang proyekto ang ilang sitio.
Uban ang pagtugot sa mga lumulupyong IP gi-survey usab dayon sa probinsya pinaagi sa buhatan sa Provincial Assessors Office [PASSO] ang 2 ka ektaryas nga luna, gi-layout og gi-subdivide ngadto sa tag 600 sq. meters aron tukoran og 6.3 X 6.3 meters ang gidak-on nga balay alang sa 30 ka IPs nga kanhi mga rebelde.
Gidasig usab ni Provincial Administrator Gerry Joey S. Laurito ang mga lumulupyo nga mananom gyud kay usa kini sa damgo ni Gov. Corvera nga palambuon ug pag develop diha sa agrikultura ubos sa iyang proyektong Plant! Plant! Plant! sa AGUSAN UP! ang kampanya sa pagpalambo sa agrikultura ubos sa administrasyon ni Gov. Dale B. Corvera kaabag ang buhatan ni Congw. Angel Amante-Matba.
Dako usab ang pasalamat sa mga lumulupyo nga bisan sa ka-hilit sa maong sitio, napadangtan gihapon sila og mga serbisyo.
“Bisag ing-ani atong kahimtang diri, pero karon adlawa nakita gyud nato, bisan unsa kalisod sa atong sitwasyon diri alang niining atoang activity… Karon adlawa nakita gyud namo ang kalambuan nga gikan sa pila ka ahensya nga nia karon adlawa” matod ni Rasman, Vice- Chairman sa Sitio Linao-linao.
Sa laing bahin nakapadangat ang Provincial Agriculture Office [PAO] og assorted vegetable seeds.
Nag apod-apod usab og hygiene kits ang buhatan sa NCIP.
Nakapadangat usab og 100 ka tsinelas ug 80 ka dulaan alang sa mga kabataan ang Newry Airsoft Skirmishers Association (NASA) Caraga.
Sa maong survey nakuha usab sa mga personahe sa kapitolyo kung NCIP unsa pay gikinahanglang serbisyo sa mga lumulupyo nga mapadangat sa probinsya ug sa nagkadaiyang ahensya sa gobyerno.
Nitambong usab sa maong site validation ang mga personahe sa buhatan sa Provincial Planning and Development Office (PPDO) Provincial Engineering Office (PEO), Provincial Social Welfare and Development Office (PSWD), Agusan Up Coordinating Center, sa Philippine National Police, 23rd Infantry Battalion sa Militar ug mga Barangay Officials. (Shena Mae Pabia with reports from Nibika Calixto ug Jheny Fabian, LGU Agusan del Norte/PIA Agusan del Norte)
