DAKBAYAN SA BUTUAN -- Giila atol sa 9th Regional Competitiveness Summit Cities and Municipalities Competitiveness Index (CMCI) adtung Disyembre 14 ang Munisipyo sa Nasipit, Agusan del Norte nga Top 1 isip Most Improved sa 3rd-4th Class Municipalities sa tibuok nasud.

Ang CMCI usa ka programa nga gipalambo ubos sa Department of Trade and Industry (DTI) kaabag ang National Competitiveness Council pinaagi sa Regional Competitiveness Committees (RCCs) nga nag-ila sa ang-ang sa competitiveness sa mga lungsod ug syudad sa nasud.  Ang ranking sa Philippine cities and municipalities ginahimo matag tuig.

Ang ranking gibase sa datos nga nag sukod sa ilang performance gamit ang lima ka pillars: Economic Dynamism, Government Efficiency, Infrastructure, Resiliency ug Innovation. Ubos sa CMCI adunay lima ka nagka lain-laing competitiveness ranking categories: Provinces, Component Cities, 5th-6th Class Municipalities, Highly Urbanized Cities ug 3rd-4th Class Municipalities.

Sa iyang mensahe, mapasalamaton si Vice Mayor Leonardo C. Beniga, isip representante ni Mayor Enrico Corvera, sa DTI Competitiveness Bureau sa pag-ila sa Nasipit Most Improved Municipality sa 3rd-4th Class Municipalities nga kategoriya.

Ang pagpaangat sa katakus sa mga Local Government Units (LGUs) pagpalambo sa ekonomiya kabahin sa ginapanday sa probinsya pinaagi sa pagpahiluna ug mga kolaborasyon sa ekonomikanhong kalihukan ubos sa AGUSAN UP!, ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kong. Angel Amante-Matba. (Shena Mae Pabia, LGU-Agusan del Norte/PIA-Agusan del Norte)