DAKBAYAN SA BUTUAN -- Gipadayon atol sa kasaulogan sa “Araw nga Simbalan” adtung Disyembre 7 ang Tourism Lane Development sa may Barangay Simbalan nga bahin sa kalsada nga nagkonekta sa Las Nieves ug Buenavista.
Ang maong kalihukan nag-apil ning higayona sa ikatulong hugna pagpananum og Palawan Cherry sa duha ka daplin sa kalsada.
Gihimo ang unang hugna niini atol sa pagsaulog sa “Araw ng Agusan del Norte” niadtong Hunyo. Ang ikaduha gihimo atol sa kasaulogan sa ikaduhang tuig sa pagpundar sa AGUSAN UP!, ang kampanya sa pagpalambo sa administrasyon ni Gob. Dale Corvera kaabag ang buhatan ni Kong. Angel Amante-Matba.
Apil ang gipangtanum sa unang duha ka hugna, kapin sa 2,000 ka semilya na o 10 kilometros na ang maabtan sa kalsada sa maong pagpananum.
Kapin sa 300 ang miapil sa maong pagpananum kaganiha, kadaghanan kanila mga benepisyaryo sa 4P's sa Department of Social Welfare and Development (DSWD).
Sumala ni Brgy. Captain Walter Tuga nga sa 300 ka partisipante naay 17 ka grupo ug matag grupo naay gitawag nga "parent leader" nga maoy mo lantaw ug mag-monitor sa mga miyembro.
Ang matag benepisyaryo, dugang ni Kapitan Tuga, naay labing ubos upat ka semilya nga atimanon, apil na niini ang paghinlo sa palibot ug pagmentinar hangtud na nga kini mamulak.
Ang pagpananum og kahoy kabahin sa Lunhaw’ng Agusan Flagship Program nga nagpunting pagtanum sa gibana-banang 23,000 ektaryas nga protection forest areas aron mapasiuli ang kabaskug sa kinaiyahan sa probinsya. (Shena Mae Pabia, LGU-Agusan del Norte/PIA-Agusan del Norte)
