DAKBAYAN SA BUTUAN -- Gikonsidera sa usa ka panagtigum sa mga Municipal Planning and Development Coordinators (MPDC) sa mga lungsod sa Agusan del Norte ang mga yuta nga posibleng himoon nilang Special Economic Zone (SEZ) nga kapanukaran sa value-added ventures, apil na ang mga agricultural processing activities nga maoy gilantaw nga kab-oton alang sa mas taas pa nga estado sa ekonomikanhong paglambo pag-abot sa tuig 2027. 

Ang kalihukan nagsilbing follow through sa mga kasabutan tali sa probinysa ug sa Philippine Economic Zone Authority (PEZA) aron mapahiluna ang mga processing activities sa probinsya. 

Una na’ng napahiluna ang partnership sa probinsya, sa PEZA ug sa lungsod sa Nasipit aron ipursige na ang pag-develop sa Nasipit Agusan del Norte Industrial Estate (NANIE) nga naproklama na isip SEZ niadto pang 1998. Isip follow through nga lakang, nagdala na si Director General Charito B. Plaza sa PEZA og possible developer, ang Malaysian Thai Development (MTD) sa miaging semana ug naa na karon sa pagbayloay ug impormasyon alang sa detalyeng pagplano sa proyekto.

Una na usab nga napresenta sa Cabadbaran City ang proyketong Sports Complex niini alang sa prosibleng partnership tali sa MTD. 

Sa panagtigum ganiha gikonsidera sa lungsod sa Magallanes ang 20 ektaryas nga area nga gipanag-iya sa lungsod sa may fish pond areas niini aron himoong Aqua Marine Park. Nagdagan usab karon ang kasabutan alang Public-Private Partnership tali sa munisipyo ug sa usa ka energy company pagmugna og pasilidades alang sa Waste-to-Energy facilities isip kabahin sa proyektong Proces! Process! Process! sa AGUSAN UP! Development Campaign. 

Plano usab sa Jabonga nga himoong SEZ alang sa mga pasilidades sa turismo ang parte sa Lake Mainit. Nagdagan usab karon isip kabahin sa AGUSAN UP! ang Coconut Processing Expansion Project sa maong lungsod nga posibleng padak-an aron mahimong SEZ sa pagproseso sa lubi sa tibuok probinsya.

Alang sa Las Nieves, gilantaw ang kabahin sa lapad nga site sa Regional Dairy Stock Farm nga posibleng mahimong lokasyon sa agricultural processing complex, apil na niini ang giplano na’ng daan nga Feed Processing Complex, laing kabahin sa AGUSAN UP!

Plano usab sa probinsya nga mugnaon ang IT Park sa bahin sa luna niini sa bag-ong kapitolyo sa syudad sa Cabadbaran.

Ang laing mga lungsod magbaton pa og luna o makigsabot pa sa pribadong indibidwal, grupo o korporasyon aron makamugna og SEZ sa ilang tagsa-tagsa ka lugar, apil na niini ang pakig-partner sa mga Indigenous Peoples (IP) pag-alokar sa parte sa ilang ancestral domain aron magsilbing luna alang sa value-adding ventures nga makamugna og trabaho ug dugang bahandi sa ilang lungsod ug sa probinsya.

Gipahiluna usab ang mosunod nga lain pang mga core processing projects sa mosunod nga mga lungsod ug nanginahanglan usab ug luna: Country Wood ug Chocolate City sa Nasipit; Coffee Net ug Sardine Processing sa Buenavista; Beyond Rice sa RTR; Abaca Processing Complex sa Cabadbaran; Mineral Processing sa Tubay; Banana Processing Complex sa Santiago; Moringa Processing Expansion sa Jabonga, ug; Food Basket sa Kitcharao.

Ang AGUSAN UP! mao ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kong. Angel Amante-Matba. (LGU-Agusan del Norte/PIA-Agusan del Norte)