DAKBAYAN SA BUTUAN -- Mokabat sa 238 ka mga Persons with Disabilities (PWDs) sa probinsya sa Agusan del Norte ang maka-benepisyo sa nagkadaiyang libreng operasyon agi sa inisyatiba sa probinsyal nga panggamhanan ubos sa administrasyon ni Gob. Angel Amante pinaagi sa buhatan sa Provincial Social Welfare and Development (PSWD) uban sa pakigtambayayong sa Tebow Cure Hospital sa Davao City. 

Sa nahitabong Free Bone Screening & Medical Assessment sa Provincial Capitol Covered Court sa Syudad sa Butuan, ubay-ubay ka mga PWDs ang mahatagan og kahigayonan nga ma-operahan sa mga medical experts gikan sa Davao City sama sa harelip/cleft palate (bungi) - 177, hernia - 17 ug orthopedic (sakit sa bukog) – 44. 

Sumala pa ni Dr. Silver Joy Tejano, hepe sa PSWDO, gibuhat kini nga kalihukan aron matabangan ang mga PWDs sa probinsya nga walay kapasidad nga makapatambal sa ilang kaugalingon ilabina sa pagpa-opera.

Pasabot niya, subay sa proseso niini, kinahanglan nga membro sa Philippine Health Insurance Corporation (PhilHealth) ang nasangpit nga mga PWDs aron maka-avail sa maong operasyon. Motabang usab ang LGUs nga mo-pasilitar nga ma-enroll sa PhilHealth pananglitan dili pa kini sila membro.

Dili usab mabalaka ang nasangpit nga PWDs tungod libre ang transportasyon niini padulong sa Davao nga maoy abagan sa matag LGUs, dugang ni Tejano.

Ang maong kalihukan kabahin sa pag-selebrar sa 44th National Disability Prevention and Rehabilitation (NDPR)  ubos sa temang “Pamahalaan kabalikat sa Pagtupad ng Pantay na Edukasyon, Trabaho at Kabuhayan, tugon sa Pagpapalakas ng Taong May Kapansanan.” (LGU Agusan del Norte/PIA Agusan del Norte)