DAKBAYAN SA BUTUAN -- Mikunhod ang ihap sa malnutrition rate sa probinsya sa Agusan del Norte mahitungod sa prevalence rate ubos sa kategorya nga Wasting ug Underweight malnutrition sa tuig 2022 kung kini itandi sa tuig 2021.
Base sa taho ni Emelyn Fabiaña, Nutrition Program Coordinator sa buhatan sa Provincial Social Welfare and Development (PSWD), miubos na sa 1.2% ang prevalence rate sa moderate & severe Wasting o (ubos og timbang alang sa katas-on sa bata) gikan sa 2.0% sa tuig 2021. Samtang ang underweight & severe Underweight o (ubos og timbang alang sa edad) anaa na karon sa 3.7% kumpara sa 6.1% sa 2021.
Matud pa ni Fabiaña, gipahingusgan karon sa probinsyal nga panggamhanan ubos sa liderato ni Gob. Angelica Rosedell M. Amante ug ni Kong. Dale B. Corvera nga maduso ang pag-pugong ug ma-resolba ang malnutrition sa wasting, underweight ug stunting sa tibuok lalawigan.
Kabahin niini, aktibo nag monitor ang membro sa nutrition council sa probinsyal nga panggamhanan uban sa Barangay Nutrition Scholars (BNS) sa matag lungsod sa probinsya. Mas gipalapdan pa ang adbokasiya ug pagpahibalo mahitungod sa maayong pamaagi aron mapadayon ang pag-ubos sa malnutrisyon rate sa tibuok lalawigan.
Sa pagkakaron, mas gitutukan na usab sa maong buhatan nga makunhoran ang ihap sa severe stunting malnutrition o kadtong mubo nga mga bata nag nag edad og 2 anyos paubos. Base sa datus nga nakuha, moabot sa 7.3% ang prevalence rate niini gikan sa 6.6% sa tuig 2021.
Pasabot ni Fabiaña, daku ang kabahin ug epekto sa First 1000 days nga gisulong karon nga kampanya sa National Nutrition Council – Caraga nga labing gi-suportahan sa probinsyal nga panggamhanan sa pagpangulo ni Gob. Angelica Rosedell M. Amante ug ni Kong. Dale B. Corvera. Ang kampanya sa First 1000 days, makatabang nga mapalig-on ang nutrisyon sa bata sulod sa 1000 ka adlaw sugod sa pagburos sa inahan hangtud sa pagpadaku niini.
Subay niini, nagtapok ang tanang BNS sa probinsya alang sa Barangay Nutrition Scholars’ Summit subay sa pagsaulog sa National Breastfeeding Awareness Month niadtong Agosto 26 sa Provincial Covered Court.
Atol sa maong kalihukan, gipahibalo ngadto sa mga BNS ang importansya sa breastfeeding ug ang kamahinungdanon sa prenatal check-up ug nutrition counselling alang sa tanang mabdos ug lactating nga inahan alang ma-siguro ang nutrition sulod sa 1000 days.
Gawas niini, nanghatag usab ang probinsya og mga breastfeeding ug nourishment kits alang sa mga anemic ug ubos og Body Mass Index nga mga buntis nga inahan. (KKD, LGU Agusan del Norte/PIA Agusan del Norte)
