DAKBAYAN SA BUTUAN -- Mokabat sa 50 ka mga Gulayan sa Paaralan Program (GPP) Coordinators sa nagkalain-laing tulunghaan sa probinsya sa Agusan del Norte ang gibansay mahitungod sa Integrated Farming and Organic Agriculture sa Butuan City.

Ang maong pagbansay, gipangunahan sa buhatan sa Provincial Agriculture Office (PAO) kaabag ang Department of Education – Agusan del Norte ug Department of Agriculture – Caraga ubos sa GPP sa probinsya nga panggamhanan.

Kabahin kini sa padayon nga mga lakang nga gihimo sa probinsya nga panggamhanan nga matabangan ang mga mag-uuma ug fisherfolk sa probinsya ubos sa kamanduan ni Gob. Ma. Angelica Rosedell M. Amante pinaagi sa programang AGUSAN UP diin gisugdan ni kanhing gobernador, Kong. Dale B. Corvera kaniadto. 

Tumong sa maong kalihukan nga mapausbaw pa ang ilang kaalam mahitungod sa agrikultura gikan sa produksyon hangtud sa pag-atiman lakip na ang pag-gamit og organic nga materyales niini. Tinguha usab niini nga matagaan sila og kapasidad nga mo-giya sa pagdumala sa implementasyon sa maong programa sa tagsa-tagsang ka tulunghaan. 

Kalabot usab kini sa preparasyon sa umaabot nga indigay sa Search for Best GPP School Implementer nga magsugod karong Oktubre.

Tudloan ang nasangpit nga mga partisipante mahitungod sa Livestock Production and Management, Vegetable Production and Management, Tilapia Production and Fish Pond Management ug Organic Farming. Tudloan usab kini sila og aktwal nga Concoction Formulation o Demonstration. 

Mitambong sa maong kalihukan si Provincial Administrator Elizabeth Marie Calo, isip representante ni Gob. Angel Amante uban ni Provincial Agriculturist Alvin Aclan ug mga personahe sa DA-Caraga. (KKD, LGU Agusan del Norte/PIA Agusan del Norte)