DAKBAYAN SA BUTUAN -- Gihisgutan niadtong  Agosto 16, ang posibleng partnerships sa buhatan ni Kongresista Dale B. Corvera ug sa Department of Agriculture diha sa mga serbisyo pagpalambo sa agrikultura ingon man tali sa Departemnt of Health diha sa serbisyo sa panglawas.

Sa panaghisgut, gipadayag sa mga personahe sa Congressional District Office ni Kongresista Corvera ang direksyon sa pagpangalagad niini nga subay sa panglantaw sa paglambo sa probinsya sa Agusan del Norte ubos sa liderato ni Gob. Ma. Angelica Rosedell M. Amante. Nakaankla kini sa development framework sa AGUSAN UP!, ang kampanya sa pagapalambo sa Kongresista sa gobernador pa siya sa miaging termino kansang ideya, sumala pa ni Gob. Amante, iyang ipadayon.

Ubos sa AGUSAN UP!, apil sa gipadagan ang mga proyektong Food Security Enhancement ug magakaluhang proyekto sa Plant! Plant! Plant! ug Process! Process! Process! ubos sa flagship program nga Plant and Process for Prosperity (AGUS 3Ps). Haum kini, sumala pa ni Regional Executive Director Ricardo M. Oñate, sa gisunod sa DA karon nga upat ka pillars nga mao ang industrialization, modernization, consolidation ug modernization. Niini, nagkasabot ang duha ka buhatan nga padayon ang himoong mga konsultasyon aron magkasuportahay sa isig ka direksyon ug proyekto.

Sa sayo pang bahin sa buntag, mipadayag usab ang rehiyonal nga buhatan sa Department of Health sa laing konsultasyon nga dayag ang panginahanglan sa pagtambayayong sa buhatan ni Kongresita Corvera ug sa DOH. 

Sumala pa kang Dr. Cesar C. Cassion nga usa sa posibleng buligan sa duha ka buhatan mao ang pag-upgrade sa mga pasilidades sa mga hospital sa distrito, butang nga gikinahanglan aron mapataas ang kalidad sa medikal nga serbisyo nga mapadangat. Dugang ni Dr. Cassion nga naay Five-Year Facilities Development Plant ang iyang buhatan ug i-discuss kini niya unya sa buhatan ni Kongresista Corvera.

Suportado sa DOH-Caraga ang upgrading sa Agusan del Norte Provincial Hospital ngadto sa Level III nga hospital ug isip training facility sa medical personnel sa rehiyon ug ang expansion niini ngadto sa usa ka 300-bed hospital kansang blaudnon (House Bill No. 1326) napasaka na ni Kongresista Corvera sa nasudnong balay balauranan niadto pang Hulyo 6. Wala pay sama niini nga facility sa tibuok Caraga, dugang ni Cassion.

Kalabot sa mga hinabang sa hospitalization sa mga indigents, suportado ni Dr. Cassion ang buot ni Kongresista Corvera nga pagpahiluna ubos sa Amomang Agusanon nga programa niini og mas lapad pa nga maabot ning maong matang sa serbisyo.  Dugang ni Cassion nga naay inisyatiba ang iyang buhatan nga gawas sa mga pangpublikong hospital himoon nilang available kini alang sa mga indigents sa mga pribadong hospital. Kini ang laing gilantaw nga maplastar pa gyod  sa pagtambayayong sa DOH ug sa buhatan ni Kongresista Corvera. (Agusan del Norte 2nd CDO/PIA Agusan del Norte)