DAKBAYAN SA BUTUAN -- Gipahiluna sa buhatan ni Kongresista Dale B. Corvera sa Second congressional district sa Agusan del Norte nga makahatag og temporaryong trabaho sa labing ubos 500 ka residente nga ang nag-unang pangita mao ang pagpangisda og tamban ug labing apektado sa dakung pagkunhod sa kuha sa maong isda niining higayona.
Kadaghanan sa mga mangingisda og tamban sa Agusan del Norte naa sa mga lungsod sa Tubay, Magallanes, Buenavista, Nasipit, Carmen ug sa Syudad sa Cabadbaran.
Mahinumdoman nga nasayran ni Kongresista Corvera ang lisud nga kahimtang sa mga mangingisda og tamban karon samtang nakigkulokabildo sa mga residente sa Barangay Calibunan sa Cabadbaran City sa miaging semana.
Isip tubag sa maong kahimtang gisulatan sa kongresista ang Bureau of Fisheries and Aquatic Resources (BFAR) pagpakisayod unsa ang mahimong aksyon sa ahensya sa maong concern.
Naay gisugyot ang BFAR nga mga aksyon sama sa paglimita sa katas-on sa pukot aron malikayan ang overfishing ug pagdili na sa gamay ra kaayo ang mata nga pukot aron dili maapil ang mga gagmay pa, mga long term nga mga aksyon nga kinhanglan gyod himoon.
Apan gitan-aw ni Kongresista Corvera nga nagkinahanglan ang mga apektadong mangingisda og tamban og hinanaling suporta aron matabangan paglabang sa ilang kalisud karon. Kini ang hinungdan nga gisulod niya ang mga indigent nga apektadong mangingisda nga priority beneficiaries sa bag-ong alokasyon nga iyang nahangyo gikan sa kaulohan karong bag-o lamang ubos programang Tulong Panghapbuhay sa Disadvantaged/ Displaced Workers (TUPAD) nga gidumala sa Department of Labor and Employment (DOLE).
Ubos sa TUPAD makatrabaho ang apektadong mangingisda sulod sa 15 ka adlaw sa sweldo nga Php350 ang adlaw. (Hala Bira Sa Kongreso/PIA Agusan del Norte)
