DAKBAYAN SA BUTUAN -- Gipahiluna sa usa ka meeting ang convergence sa pagpadangat og ekonomikanhong serbisyo tali sa Agusan del Norte Congressional District Office (CDO) ni Kongresista Dale B. Corvera kauban ang mga probinsyal nga buhatan sa Department of Trade and Industry (DTI), Department of Labor and Employment (DOLE) ug sa Technical Education and Skills Development Authority (TESDA).
Gikan sa diskusyon pagseguro nga naay sustainable nga mga proyekto nga motumaw gikan sa livelihood assistance grants ug cash-for-work activities, misentro and panaghisgut sa pagtinabangay alang sa padayong pagpahiluna sa core processing projects ubos sa Process! Process! Process! campaign sa AGUSAN UP!, ang development framework nga dala ni Kongresista Corvera sa iyang pagka-gobernador sa miaging tulo ka tuig nga sumala pa ni Gob. Ma. Angelica Rosedell M. Amante iyang ipadayon sa iyang termino.
Apil sa tabangan pagpahiluna sa mga ahensya ug sa buhatan ni Kongresista Corvera nga magsilbing suporta unya sa mga insiyatiba sa kampanya sa ekonomikanhong paglambo sa probinsyal nga panggamhanan mao ang core processing projects development assistance, corporate set-up development, market development support, product and technology development assistance ingon man ang mga pagbansay sa kahanas ngadto na sa supervirsory ug management capabilities sa mga lumilihuk sa proyekto.
Mahimong kabahin sa mga kalihukan sa pagpalambo unya mao ang suporta alang sa Plant! Plant! Plant! nga kaluhang proyekto sa Process! Process! Process! tungod sa panginahanglan og igong hilaw nga materyales nga ibahug unya sa mga processing activities.
Tungod sa nahiluna nang mga inisyal nga lihuk ug naplastar na nga mga plano, ang “Coffee Net” sa Buenavista, “Country Wood” ug “Chocolate City” sa Nasipit ang mga core processing projects nga unang tutokan sa convergence. Apan padayong gahinan og igong suporta ang “Orchard Stopover” sa Carmen, “Beyond Rice” sa RTR ug “Food Basket” sa Kitcharao ug mahimong priorities sa ikaduhang tuig. Ang ubang mga core processing projects tutokan sa ikatulong tuig.
Mahimong kabahin usab sa maong convergence unya mao ang Department of Agriculture (DA), ang Philippine Fiber Development Authority (PhilFida) ug ang Philippine Coconut Authority (PCA) kansang core processing project nga gitutokan, ang coconut processing center sa Jabonga, nagdagan na karon.
Tungod sa dakung papel niini sa teknolohiya, nakita usab ang dakung panginahanglan sa Department of Science and Technology (DOST) nga daan nang nagpahayag og interest pag-apil sa mahimong convergence.
Apil sa meeting sila si Provincial Directors Lorijane Sacote sa DTI, Keith Duran sa DOLE ug Rey Cueva sa TESDA. (Hulagway kuha ni Nibika Calixtro ug Jenny Fabian/Hala Bira Sa Kongreso/PIA Agusan del Norte)
