DAKBAYAN SA BUTUAN -- Gi turn-over sa probinsyal nga panggamhanan sa Agusan del Norte ang Php20 milyones nga bag-ong duha ka andana nga merkado publiko sa lungsod sa Rwmdios T. Romualdez (RTR).
Mismo si Provincial Governor Ma. Angelica Rosedell M. Amante ang nanguna sa maong seremonya uban nila RTR Mayor Richard Daquipil, mga Sangguniang Bayan members, empleyado sa munisipyo, ug uban pa.
Ang maong merkado publiko gi-dugangan og pundo gikan sa panudlanan sa probinsya nga Php10 million alang sa phase 2 sa panahon ni Kongresista Dale B. Corvera ug ang laing Php10 million gikan sa Department of Budget and Management-Local Government Support Fund (DBM-LGSF) sa phase 1.
Sumala pa ni Gob. Amante, daku kaayo ni nga tabang sa pang ekonomikanhong aktibidades sa lungsod tungod makahatag kini og dugang local income sa munisipyo.
Paambit niya, talewala sa kagamay sa budget sa maong munisipyo isip 5th class municipality, aduna gihapon namugna nga mga dagkong proyekto sa maong lungsod tungod sa panaghiusa sa mga lideres tali sa probinsya ug munisipyo.
Hangyo lang sa gobernador sa katawhan nga mag tinabangay ang matag usa alang sa kalambuan sa probinsya.
Gawas niini, gi-anunsyo usab ni Gob. Amante nga mag gahin og budget ang probinsya og Php15 million sunod tuig aron matabangan ang mga mag-uuma sa RTR. (Karen Decamotan, hulagway kuha ni RFA, LGU Agusan del Norte/PIA Agusan del Norte)
