DAKBAYAN SA BUTUAN -- Dili na maglisod ang mga mag-uuma sa Brgy. San Antonio sa lungsod sa RTR, Agusan del Norte karon nga natunol na ang dugay na nilang gidamgo nga abaca stripping machines sa ilang dapit niadtong Lunes, September 27, 2022.
Ang San Antonio Integrated Farmers Multi-Purpose Cooperative (SAIFMULCO) maoy swerting nakadawat ug magdumala sa nasangpit na ekipo alang sa dugang kagamitan sa pag-aghot sa abaca sa ilang dapit.
Ang SAIFMULCO usa lamang sa pipila ka mga hugpong sa mga mag-uuma na makadawat sa ekipo. Ang maong kooperatiba, gikabutyag nga aduna pay madawat na gilangkoban sa usa ka weighing scale ug 2-push cart trolley. Kini nga kabahinan mokabat sa PhP791 ka libo ang gigahin sa kasamtangan tuig.
Si Provincial Agrarian Reform Program Officer II (PARPO II) Glen A. Petilla nagkanayon nga ang probisyon sa ekipo kabahin sa 9-point agenda ni Presidente Ferdinand Marcos, Jr. nga ang bugtong tumong mao ang pagpalig-on sa mga organisasyon sa mag-uuma pinaagi sa paghatag og suporta sama sa makinaryas ug pagbansay-bansay sa mga teknolohiya aron molambo ang ilang negosyo.
Si Ellen Torralba, Chief Agrarian Reform Program Officer-Agrarian Reform Beneficiaries Development and Sustainability Program CARPO-ARBDSP, nagkanayon nga kining mga proyekto naghatag og bag-ong paglaum isip tubag sa mga panginahanglan sa mga mag-uuma aron makab-ot ang dugay na nilang mga damgo.
Gibutyag ni Engr Milben Gata, CRFPSP Point person ning buhatan sa DAR, kini ilawom sa proyektong Climate Resilient Farm Productivity Support Project (CRFPSP) sa Department of Agrarian Reform (DAR) ning probinsya.
Dugang pa ni Engr. Gata na ang nasangpit na ekipo makahatag ug dugang abot sa SAIFMULCO ug mga membro niini, diin nag-unang panginabuhian mao ang pagbaligya og abaca.
Walay kasudlan sa kalipay sa mga mag-uuma sa abaca sa San Antonio ug sikbit nga dapit kay sukad pa kaniadto mag-lisod gayud sila sa gamay nga kita tungod sa mano-mano nga pama-agi, apan karon aduna nay ekipo mamahimong mapadali na ang pag-hagkot ug modako na usab ang ilang kita.
Si Joseph Dequit, Chairperson sa SAIFMULCO malipayon nga nag pasalamat sa gasa nga ilang nadawat gikan sa Department of Agrarian Reform (DAR) ning probensya sa Agusan del Norte.
Sa laing dapit usab ning probinsaya, gitunol usab sa Bonifacio Agrarian Reform Cooperative (BARC) sa lungsod sa Las Nieves, ang usa ka stripping machine nga giapangunahan ni MARPO Cecilia G. Concon ug mapalipayong nga gidawat ni Chairperson Luisito P. Lumantas.
Lakip sa panagtigum mao ang Municipal Agrarian Reform Program Officers (MARPO) sa RTR na si Joseph Cleogin U. Torralba ug ang mga local ug barangay officials sa lungsod sa RTR. (Gil E. Miranda, DAR Agusan del Norte/PIA Agusan del Norte)
