DAKBAYAN SA BUTUAN -- Daku ang pagpasalamat sa mga lumolupyo sa Sitio Salaysayon Barangay Jaguimitan, usa sa mga hilit nga sitio sa lungsod sa Nasipit, Agusan del Norte, diin personal kini gibisitahan ni Gob. Ma. Angelica Rosedell M. Amante ug nagpadangat og serbisyo alang sa mga residente niini.

“Malipayon gyud kaayo mi diri, kay bisan sa kalayo sa amung lugar ug lisud amung dalan, nianhi gyud si Gob. Angel (Amante) ug gipadala gyud ang mga serbisyo diri. Daku gyud kaayo amung pasalamat sa tabang ni Gob. Angel ug laing ahensya.”

Kini ang mensahe nga gipaabot ni Ireneo Lauro, kapitan sa Brgy. Jaguimitan atol sa Kalinga Alay sa Katutubo: NCIP Caraga Service Caravan niadtong Septembre 27. Gipangunahan kini sa opisina sa National Commission on Indigenous People (NCIP) – Caraga uban sa pakigtambayayong sa nagkalain-laing opisina sa probinsyal nga panggamhanan ug ahensya sa rehiyon.

Mosuma sa 507 ka indibidwal o 96 ka panimalay sa Sitio Salaysayon ug ang kasikbit niini nga sitio maong Sitio Baboy-baboy ang napadangatan og libreng serbisyong medikal, konsultasyon, dental, family planning, gupit, tuli, panghatag og mga gamit pang eskwela, medisina, foodpacks ug uban pa.

Gawas niini, gitubag usab ni Gob. Angel Amante ang hangyo niini ang pagpatukod og purok center sa maong lugar lakip na ang personal nga hangyo sa pipila ka mga residente niini. 

Hangyo lang sa gobernador ngadto sa mga lumulupyo sa nasangpit nga sitio ilabina sa mga kabatan-onan nga dili mouban sa mga kalihukan nga gi-organisa sa mga rebelde o New People’s Army (NPA). Alang sa gobernador, daku kaayo ni nga kapakyasan sa kaugmaon sa mga batan-on kung mouban kini sila. 

“Timan-e ni ninyo mga batan-on, kung magpadala mo, inyo ng gisugal ang inyong kaugmaon. Dili perpekto ang atong goberno pero ang atong goberno naningkamot nga magpakabana para kaninyo. Mang hinaot ko nga kanunay gyud ta mag-uban sa sabakan sa goberno” panapos na pabilin nga mensahe ni Gob. Amante. 

Daku usab ang pagpasalamat sa buhatan sa NCIP – Caraga nga gipangulohan ni NCIP Regional Director Ordonio P. Rocero, Jr. ngadto kay Gob. Angel Amante tungod sa dakung suporta nga gipadangat sa gobernador nga mapundohan ang maong programa panahon siya pa ang kongresista. 

Apil sa miuban sa maong Service Caravan mao sila Brigade General Adonis Ariel G. Orio sa 402nd Infantry (Stingers) Brigade sa Philippine Army, PCol. Filemon O. Pacious sa Agusan del Norte-Provincial Police Office, Dr. Odelio Ferrer hepe sa Provincial Health Office ug uban pa. 

Ang mga opisina ug ahensya nga nagpadangat og mga serbisyo sa maong lugar mao ang PLGU sa PHO, PSWD, PDRRMO, BLGU-Jaguimitan, RHU-Nasipit, POPCOM, TESDA, DTI, LTO, DOTR, Philhealth, 402nd Brigade, PA, 23IB ug PNP-ADN. (Karen Decamotan, LGU Agusan del Norte/Hulagway kuha ni Reuben Don Sanchez ug Ronron Amante/PIA Agusan del Norte)