TACLOBAN CITY - Ginplaplanuhan han City Government an pagtukod hin mga condominium-type nga housing units sunod nga tuig. Subay  kan Tedence Jopson, Community Development Officer IV han City Housing and Community Development Office nga an plano nga housing project pagtutukuron ha tuna nga gintatag-iyahan han syudad ha Brgy. Cabalawan.

An proyekto nga pagtutukuron ha 2.8-hectare nga city government property, mayda maximum mga lima ka andana nga building ngan mag-uupod hin mahugot nga site development kay magkakaada ini hin open space o parke, parking ngan commercial areas. Mahihimo gihap ini nga 'clean and green building' kay magkakaada ine hin solar power system.

Mahihimo ini nga 'pilot' o pauna nga proyekto han syudad ha medium-rise social housing development, ngan posible pinakauna ha bug-os nga rehiyon ha konsepto hin housing units ha sulod hin multi-storey building.

Nagtikang na an planning stage han mao nga prokeyto han nakalabay nga bulan, ngan gintatalaan nga mahihimo nga pinal an plano yana nga Disyembre. Pagbubuhaton an site development hin pira ka bulan ngan ginbabanabana nga matikang an construction ha 3rd quarter hiton sunod nga tuig.

Ginklaro liwat ni Jopson nga an proyekto diri pareho han mga housing projects han mga naapektohan han bagyo Yolanda kay panuyoan hini nga matagan hin 'pabahay' an mga nagtratrabaho ha gobyerno nga nanginginahanglan hin disente nga pag-uukyan.

Sumala pa ha iya, aada ha P750,000 ngada P1.5 milyones an kantidad han kada unit han mao nga condominium housing.

Samtang, mahugot an pagbubuhaton nga selection process han mga maukupar han housing project hiton first quarter han 2023, kay sisigurohon nga may kapas magbayad ini hira hin monthly amortization nga igpapaagi ha PAG-IBIG financing. (TCIO)