TRENTO, Agusan del Sur -- Nagsugod na usab niadtong Lunes, Enero 9, 2023 ang gikaandan nga Business One -Stop -Shop (BOSS) alang sa tanang mga negosyante nga adunay patigayon sa Lungsod sa Trento, ning Probinsya.
Sa gisaysay ni Business Permit and Licensing Officer Sarah A. Magsalay, lakip sa mga kinahanglanon nga dokumento sa renewal ang Cedula, Statement Gross Sales o Financial Statement, ug ang kanhing Business permit.
Gawas niini nga mga dokumento, dugang ipakita ang Department of Trade and Industry (DTI) Certificate, Securities and Exchange Commission (SEC) ug Cooperative Development Authority (CDA) Registration Certificate alang sa buot mulukat ug bag-ong permit nga indibidwal o kooperatiba.
Mamahimong venue sa BOSS ang Municipal Lobby sumala sa gikauyonan sa komitiba arun kini mahaduol sa Municipal Treasury Office diin ipahigayon ang One-Time Payment sa tanang mga legal nga bayronon.
Arun mas mapasayon, tulo (3) lamang ka lakang ang pagabuhaton sa pag-proseso ug renewal o bag-ong lisensya – (1) makigkita sa BPL Officer alang sa business profiling; (2) dala ang kumpletong requirements, muadto sa Treasury Office alang sa billing ug bayad; ug, (3) mubalik sa BPL Office alang sa releasing sa business license o permit.
Kung wala’y mga kakulian, gibana-bana nga mukabat lamang ug pipila ka oras ang proseso sa paglukat ug permit, apan gikinahanglan nga ikunsidera sa matag-usa ang uban pang mga aspeto nga mamahimong makalangan sa transaksyon, labi na ang Internet connection nga mao’y usa ka hinungdan sa pagkalangan.
Miapila usab si BPLO Magsalay sa tanang mga mulukat nga kun mahimo dili na mulapas sa Enero 20, 2023 kay posibleng wala nay extension sa BOSS karong tuiga, ug aduna na usa’y penalty alang sa mga ulahi nga transaksyon.
Dugang pahimangno sa BPLO alang sa tanang mga negosyante nga sugod sa unang semana sa Pebrero 2023, muhatag ug First Notice ang lokal nga panggamhanan alang sa mga walay business permit, Second Notice human sa usa ka semana, ug kun dili pa gihapon maaksyonan human sa pito (7) ka adlaw, Closure sa maong establismento.
Sa mga bulan sa Enero taman sa Marso 2023, ang tanang balayronon magabase sa daan nga schedules, apan sa pagsugod sa 2nd Quarter, ang bag-ong aprubado na nga Local Revenue Code ang pagabasehan. (Karen Alabat Calolo/ Waren Christopher Truniado Cadenas, LGU-Trento/PIA-Agusan del Sur)
