DAKBAYAN SA BUTUAN -- Gilatid karon, Enero 23, sa buhatan ni Kongresista Dale B. Corvera ug sa Department of Agriculture (DA-Caraga) ang mga pamaagi nga mapakusgan pa ang suporta alang sa proyektong Plant! Plant! Plant! sa probinsya sa Agusan del Norte.

Ang Plant! Plant! Plant! usa sa mga proyekto ubos sa AGUSAN UP!, ang kampanya sa pagpalambo ni Kongresista Corvera sa gobernador pa siya sa Agusan del Norte. Giabagan kini sa Gob. Ma. Angelica Rosedell M. Amante sa kongresista pa siya sa miaging termino ug, sumala pa kaniya, padayonon niya ang maong kampanya sa pagpalambo sa iyang administrasyon.   

Ang proyektong Plant! Plant! Plant! nagpunting nga makatanum sa 125,000 ektaryas nga bakante o wala kaayo maggamit nga mga yuta sa Agusan del Norte pag-abot sa tuig 2027. Apil sa mga na-survey nga kayutaan alang niini haum sa agro-forestry (100,000 ektaryas) ug ang laing 25,000 ektaryas alang sa high value crops, apil na ang abaka, kape, cacao, mangga, cassava, rubber, lubi ug saging.

Usa sa kritikal nga kabahin sa proyekto nga nalatid ganiha mao ang panginahanglan sa nursery alang niiini nga mga tanum ug nasabutan nga maoy unang tutokan sa suporta. Kini maoy pangitaan ug mga paagi sa DA-Caraga, sumala pa kang Marco Antonio Morido, ang Regional Focal Person sa High Value Crops Development Program sa rehiyon. 

Sa bahin sa Congressional District Office ni Kongresista Corvera, himoon usab sa Kongresista ang mga representation aron makabaton og pundo alang sa cash-for-work sa mga magtrabaho sa nursery ug sa mga apil sa pagpananum unya.

Lambigit niini, himoon sa mosunod nga mga adlaw ang mga konsultasyon sa probinsya, sa mga lungsod, ingon man sa kapin sa 70 ka mga organisayon sa mag-uuma ug mga Indigenous Peoples (IP) nga nagsilbing partners ubos sa AGUSAN UP! sa milabay’ng tulo ka tuig.

Kining maong mga kalihukan kabahin sa panawagan ni Kongresista Corvera nga pakusgan ang mga serbisyo sa iyang buhatan ug palapdan pa ang maabot ug makabenepisyo niini nga mga serbisyo. 

Gawas sa pakusgan pa nga mga social services, ipursige usab sa buhatan sa kongresista, kaabag ang probinysal nga panggamhan ug mga ahensya nga nagkasabot na alang sa usa ka convergence pagpadangat og ekonimikanhong mga serbisyo ubos sa mga proyektong  Plant! Plant! Plant, Process! Process! Process!, Sales! Sales! Sales! ug Invest! Invest! Invest! (Agusan del Norte 2nd Congressional District/PIA Agusan del Norte)