DAKBAYAN SA BUTUAN -- Mosuma sa 295 ka indigent graduating high school ug college students ang nakadawat,og tag Php4,000 isip educational assistance gamit ang Php10 milyon nga pundo ubos sa serbisyo nga gipahiluna ni Kongresista Dale B. Corvera kaabag ang Department of Social Welfare and Development (DSWD).
Nakadawat sa payout ganihang buntag sa Carmen, Agusan del Norte, ang 161 ka estudyante, ug ang laing 134, sa payout sa lungsod sa Magallanes nianang pagka hapon.
Ang maong gidaghanon sa nakadawat sa payout karon kabahin sa 2,500 ka beneficiaries sa mga estudyante nga gilantaw nga masuportahan sa ilang mga panginahanglan sa pagtungha.
Padayon ang payouts sa uban pang mga lungsod ug sa Syudad sa Cabadbaran sa mosunod nga mga semana hangtud nga mahuman kini ning bulan sa Pebrero.
Gilantaw usab ni Kongresista Corvera nga makaangkat pa og dugang pundo alang ning maong serbisyo nining tuiga aron mapalapad pa ang maabot nga suporta ilabina ning panahon nga nag-recover pa ang mga pamilya gikan sa hapak sa pandemya.
Suporta kining maong serbisyo, sumala pa ni Kongresista Corvera, sa scholarship program sa probinysa nga gipadagan ni Gob. Ma. Angelica Rosedell M. Amante aron mas modaghan pa ang maalagaran sa mga kabatan-onan sa ilang pagbaton ug edukasyon.
Ang edukasyon, dugang sa kongresista, butang nga kinahanglang hatagan og gibug-aton sa kabatan-onan tungod kay kini ang maghatag kanila og mga kahigayonan aron mahaw-as sa kalisud nga gipuy-an sa ubay-ubay sa mga residente sa probinysa karon. (Agusan del Norte 2nd Congressional District Office/Hulagway kuha ni D. Fabian/PIA Agusan del Norte)
