TACLOBAN CITY - Para han naghuhulat nga mga senior citizens nga api han Social Pension Program, ginpapasabot han Office of Senior Citizens Affairs (OSCA) nga pagbubuhaton an first quarter pay-out yana nga bulan, pero ginpapaangan-angan la kay mayda pa mga kinahanglan nga proseso.

Samtang, pagbubuhaton liwat an eleksyon han Senior Citizens Federation han syudad yana nga Marso 24, 2023 hiton alas 2 han kulop ha CEO Gym, kun diin kukuhaon an tulo nga mga kandidato nga pagpipilian para mangulo han OSCA.

An mapipili nga OSCA Head han City Government, mangungulo ha buhatan hin tulo ka tuig.

An area presidents ngan barangay presidents han mga organisasyon hin mga senior citizens amo an matambong ngan mabotos ha mao nga aktibidad.

Subay pa liwat kan OSCA Head Angela Figer, magigin maribhong an mga aktibidadis para han mga edaran han syudad yana nga tiarabut nga Hunyo kasumpay han piyesta han syudad, tungod nga ginbulkas na an pira nga restrictions o pagdire nga may kalabutan han pandemya.

Samtang, ginpapasabot liwat nga bumalhin na hin opisina an Office of Senior Citizens Affairs Office (OSCA) ha building nga atubang la han City Tourism Office ha may Plaza Rizal. (TCIO)