TACLOBAN CITY -- Ha 2025, ginlalauman nga hul-os nga mahuhuman an Phase 3 han kabug-osan nga Phase 1-3 han Tacloban Airport Development Project.
Yana, siring ni Airport Acting Manager Asher Ithamar B. Allunar, aada na ha 50% an nahuman han Phase 1 nga construction han New Passenger Terminal Building.
Ha kantidad nga P759,029,780.29, gintikangan ini nga proyekto dida pa han Disyembre 2020 ngan tinguha makumpleto ha 2025 komo usa nga International Airport.
Sumala pa kan Manager Allunar, an Daniel Z. Romualdez Airport para magin International Airport, nga asya na iton gintratrabaho yana, kinahanglan may-ada 2.5 kilometers nga kahilaba han runway, 150 meters nga air strips ha magpaluyo nga dapit han runway, runway safety area, navigational aides, ngan lightings subay hiton international standards nga makakag-giya hin maupay ha mga piloto ha paglanding ngan paglupad.
An LGU Tacloban in yana aada ha proseso han acquisition han mga tuna nga natatarap han pagpahilaba hiton runway ngadto hin 2.5 kilometers subay han iginlalarang hin usa nga international airport, siring ni Allunar.
Ha panahon nga mahuman na ini nga bag-o nga airport, ginlalantaw nga pinakamaanyag nga International Airport ini ha bug-os nga nasud han Pilipinas sugad han pahayag han nagkonsepto hini, dugang pa ni Allunar. (TCIO)
