LUNGSOD SA LAS NIEVES, Agusan del Norte -- Misalmot sa Community Based Training and Enterprise Development (CBTED) on Coco peat and Coco Coir production ang mga miembro sa Talcon Farmer’s Poverty Association (TFPA) sa Barangay Consorcia, Las Nieves.

Ang tulo ka adlaw nga training nga gihimo bag-uhay pa lamang gitambungan sa 40 ka mga partisipante.

Ang TFPA maoy usa sa pito ka mga mga People’s Organization (PO) sa lungsod nga gi-identify sa National Task Force to End Local Communist Armed Conflict (NTF-ELCAC) nga tagaan og saktong suporta gikan sa panggamhanan.

Ang Coco peat and Coco Coir production gihimo alang sa pag proseso sa coconut byproducts nga abunda sa Barangay Consorcia.

“Kamo ang pioneering nga PO nga mo undergo sa CBTED on Coco peat and Coco coir production,” pahayag ni Michael Mandahinog, ang representante ni Mayor Karen Rosales.

Dugang pa niya nga ang maong programa subay sa Executive Agenda ni Mayor Karen nga mapalawig ug mapalambo pa ang agrikultura sa lungsod pinaagi sa farm mechanization ug enterprise development.

Tumong usab sa Executive Agenda sa kasamtangang administrasyon nga mapalig-on pa ang peace agenda sa lungsod sa Las Nieves.

Ang Barangay Consorcia gideklara nga insurgency-free bunga sa pagtinabangay sa lokal nga panggamhanan sa Las Nieves ug sa 23rd Infantry “Masigasig” Battalion (23IB), Philippine Army aron matuldokan ang impluwensiya ug illegal recruitment sa walhong grupo.

Tungod sa nagpadayon nga suporta ug paningkamot sa kasundalohan, naangkon sa Consorcia ang kalinaw ug napatuman gilayon ang pipila ka mga serbisyo sa panggamhanan sama sa pagpahigayon sa CBTED.

“Ang inyong paglambo maoy mamahimong ehemplo sa uban pang POs nga gusto muuswag,” matud pa ni 2Lt. Andy Ledesma, sa 23IB.

Mitambong si Ledesma isip representante nila Lt. Col. Jeffrey Balingao, ang Battalion Commander sa 23IB ug ni 1Lt. Bench Kevin Ormilla, ang Commanding Officer sa Charlie Company sa maong unit.

Ang training napahigayon pinaagi sa pagtinabangay sa lokal nga panggamhanan ug sa mga ahensiya sa panggamhanan sama sa Technical Education and Skills Development Authority (TESDA) sa Agusan del Norte nga gipangulohan ni Provincial Director Rey M. Cueva. 

Ang pag-implementar niini usa usab ka paningkamot sa Las Nieves Training Center (LNTC) isip implementing arm sa TESDA.

Ang pagbansay sa mga PO members gipangunahan sa mga personahe sa Philippine Coconut Authority nga gipangunahan ni Manolito Casapaw, ang OIC-Division Chief sa maong buhatan. 

“Hinaot unta nga inyo gyud ning mahuman nga training arun mapahimoslan ninyo kani nga joint-effort sa nagkadaiyang ahensya sa gobyerno,” sumala pa ni Casapaw.

Nagpadayag usab sa iyang dugang pagdasig ug pagtimbaya si Norberto Ablen, ang LNTC Administrator, ngadto sa mga partisipante.

“Ang atong tumong ani matudloan mo unsaon pag convert sa inyong coconut byproducts into a profitable enterprise,” padayag ni Ablen.

Gitagaan usab ni Ablen og pagtagad ang dakong kalabutan sa uban pang ahensya sama Department of Agriculture ug Department of Trade and Industry nga mao ang nagtabang pagplastar sa mga ekwipo nga gamiton sa mga trainees. (LGU Las Nieves/PIA Agusan del Norte)