TACLOBAN CITY -- Iginsumat han opisina han Philippine Drug Enforcement Agency (PDEA) ha Tacloban City nga maduroto an ira kampanya kontra ilegal nga droga pinaagi han ira "Demand Reduction" ngan "Supply Reduction" nga mga inisyatibo para magpadayon an estado han syudad kumo Drug-cleared City.
Sumala kan Novemar H. Pinanonang, Investigation Agent III, ngan Officer-in-charge han PDEA nga ha pagkayana, mayda 127 nga drug-cleared barangays ngan 11 nga drug-free barangays an Tacloban City.
Upod gihapon hine nga numero an unom (6) nga mga hot-spot areas parti han illegal drugs.
Waray liwat igsumat han opisyal kun diin ine nga mga lugar ha syudad para dire maapektaran an ginbubuhat nga validation ngan surveillance activities han buhatan.
Subay pa liwat han opisyal nga ira naobserbahan nga nabalik naliwat an mga ilegal nga aktibidadis nga may kalabutan ha igindidire nga droga.
Basar han datos han opisina, mayda na tulo nga anti-drug operations an ira ginbuhat yana pala nga first quarter han tuig nga nakarekopo hin nabalor sobra P500,000 nga kantidad han mga ilegal nga droga.
Tungod hini, nakikigsumpayan an buhatan ha lokal nga pangobyernohan ngan tagsatagsa nga mga Barangay Anti-Drug Abuse Councils (BADAC) para han pagpatuman han community-based anti-illegal drug advocacy activities sugad han symposiums ngan iba pa nga capacity building activities.
Samtang, ginklaro ni Pinanonang kun kay ano gintawag nga "drug-cleared" an Tacloban City tikang pa han tuig 2017. Tungod kuno ine nga waray na drug dens, waray na pushers/users, laboratoryo hin ilegal nga droga; aktibo nga partisipasyon han barangay officials ha mga anti-drug activities; ngan an pagkaada hin boluntaryo ngan compulsory drug treatment ngan rehabilitation processing desk, kaupod an iba pa nga mga kondisyon ilarum han Dangerous Drug Board Resolution 3, series of 2017.
Ginaaghat han opisina an publiko nga bumulig ha kampanya kontra igindidire nga droga, ngan makigsumpayan ha ira opisina nga namumutang ha Tacloban City Convention Center, ngan ira ginpatapod nga tratrataron nga confidential an mga impormasyon. (TCIO)
