LAS NIEVES, Agusan del Norte -- Malampusong nahuman ang 60 ka mga indibidwal sa Community Based Training (CBT) on Massage Therapy kaniadtong Marso 14 sa Las Nieves Training Center, Barangay Mat-I, ning lungsod.

Ang duha ka adlaw nga training gitambongan sa mga miembro sa Solo Parents Association, Women’s Association, ug LGBTQIA+ community sa Las Nieves.

Ang tumong sa maong training mao ang paghatag og kahanas sa mga solo parents sa pagmasahe sa nga ilang magamit isip panginabuhian. 

Ang pagpahigayon sa skills training hugot nga gitutokan ni Mayor Karen Rosales ubos sa iyang agenda sa mahatagan og igong trabaho ang nagkadaiyang sektor sa mga lomulopyo sa Las Nieves, ilabi na ang gikan sa mga people’s organizations.

Ang CBT on Massage Therapy usa lamang sa pipila ka mga training gikan sa Technical Education and Skills Development Authority (TESDA) ubos sa pagdumala ni Provincial Director Rey M. Cueva. 

Ang pag-implementar niini usa usab ka paningkamot sa Las Nieves Training Center (LNTC) isip implementing arm sa TESDA. Gipangolohan kini ni Norberto Ablen, ang LNTC administrator. 

“Dako kaayo ang kalabutan sa atong lokal nga panggamhanan pinaagi sa suporta ni Mayor Karen alang sa katumanan sa trainings sa LNTC,” sumala pa ni  Ablen.

Mipadayag usab sa ilang dakong pasalamat ang mga partisipante sa among training.

“Dako among pasalamat kang Mayor Karen ani nga higayon kay dako na kini ug katabang sa amo nga mga solo parents,” nagkanayon si Melinda Amamento, ang presidente sa Las Nieves Solo Parents’ Assocation.

Ang maong training gipangunahan ni Mr. Philip Arañas, ang trainer gikan sa TESDA-Agusan del Norte.

Mitambong usab sa maong aktibidad si Mat-i Punong Barangay Jasmin Maglasang. (LGU Las Nieves/PIA Agusan del Norte)