DAKBAYAN SA BUTUAN -- Gilunsad kaniadtong Miyerkules, Abril 12  ang separate na nga building ug gipadak-an pa nga Negosyo Center sa Syudad sa Cabadbaran ug gilantaw ni Kongresista Dale B. Corvera nga mas daghan pa nga mga negosyo nga masuportahan aron mahimugso ug molambo.

Sa mensahe nga gibasa sa representante sa kongresista sa maong okasyon gi-congratulate niya ang syudad sa Cabadbaran sa pagpahiluna niini sa maong improved na kaayo nga sentro sa mga suportang serbisyo sa negosyo. Nalantaw usab sa kongresista nga mas taas pa nga ang-ang sa pagserbisyo aron molambo pa ang mga negosyo, alang sa mas taas pa nga ang-ang sa paglambo sa ekonomiya sa syudad ug sa probinsya.

Ug tungod sa presensya ning maong facility sa Cabadbaran, gihagit sa kongresista ang mga negosyante ilabina sa mga micro, small ug medium enterprises nga pun-an pa nila ang ilang kadasig ug pahimuslan ang mga serbisyo sa maong Negosyo Center aron makapatumaw og dugang pang negosyo, makamugna og dugang trabaho, makatabang sa pagpataas sa kita ug makatampo pagpalambo pa sa lokal nga ekonomiya.

Gipasalamatan usab ni  Corvera sa maong okasyon ang mga buhatan sa Department of Trade and Industry, sa Department of Labor anf Employment ug sa Department of Information and Communication Technology nga misuporta usab sa pagpahiluna sa mga himan sa maong facility nga nag-apil usab sa Information and Communication Technology (I.C.T. ) Hub.

Sa iyang balik-saysay sa pagkahimugso sa maong Negosyo Center, gibutyag ni Regional Director Gae Tidalgo sa DTI-Caraga nga ang kongresista   ang nagpahiluna sa inisyal nga operation sa Negosyo Center sa Cabadbaran sa mayor pa siya. Didto pa kini nahimutang sa likud sa kasamtangang city hall. Nabalhin ang maong facility sa may lobby nga bahin sa city hall sa pagdagan sa mga tuig ug karon naa na sa separate gyod nga building sa tabang nga bahin sa city hall.

Gipaneguro sa kongresista nga padayon ang iyang suporta sa Negosyo Center apil na ang direktang support services sa mga negosyante, usa na niini ang mga pagbansay nga gilatid sa iyang buhatan karon ug uban pang mga serbisyo ubos sa konsepto sa kampanya sa ekonomikanhong pagpalambo nga mao Plant and Process for Prosperity sa AGUSAN UP! (Agusan del Norte 2nd Congressional Office/PIA Agusan del Norte)