DAKBAYAN SA BUTUAN -- Ang buhatan sa Department of Agrarian Reform (DAR) Provincial Office sa Agusan del Norte malampusong mi-apudapod sa unom ka abaca stripping machines nga nagkantidad sa kapin P960 ka libo ka pesos kaniadtong Marso 20, 2023.

Ang maong kahimuan gipangunahan sa  DAR regional ug probinsyal nga opisina ubos sa mando ni DAR Regional Director Atty. Merlita S. Capinpuyan ug uban kaniya si Provincial Agrarian Reform Program Officer II Glen A. Petilla.

Ang maong kahimuan ilawom sa programang Climate Resilient Farm Productivity Support Project kon CRFPSP sa tumong nga ma-ayudahan ang mga uuma alang sa malahutayon nga produksyon sa abaca fiber.

Ang maong aktibidad gisalmotan sa pipila ka mga opisyales ning probensya ubos sa landong ni Agusan del Norte Governor Ma. Angelica Rosedell M. Amante-Matba nga gitambungan ni Bise-Gobernador Enrico R. Corvera ang pagdunol sa upat (4) ka abaca stripping machines ngadto sa mga mag-uuma sa abaca sa Bonifacio Agrarian Reform Cooperative sa lungsud sa Las Nieves.

Uban kaniya si Las Nieves Municipal Mayor Karen S. Rosales ug  Sangguniang Panlalawigan member Larry Bautista.

Sa pamahayag ni Provincial Agrarian Reform Program Officer II Glen A. Petilla, ang maong kagamitan gilauman nga makahatag og dugang kapasidad sa mga mag-uuma sa abaca aron matubag ang mga hagit sa panahon o climate change uban sa panghinaut aron molambo ang kapunongan ug panginabuhian sa mga mag-uuma.

Matud pa ni Bise-Gobernador Corvera ug mga opisyales ning probinsya na unta dili masayang kini nga mga ekepo uban sa hangyo sa kapunongan nga ila kining ampingan uban sa pagkugi aron makab-ot ang tukma nga kalambo-an sa hugpong sa mga mag-uuma.

Sa laing bahin, ang San Antonio Integrated Farmers Multi-Purpose Cooperative ug Santo Nino Jabonga Agrarian Reform Cooperative (SANJARCO) nakadawat usab sa susamang mga ekipo. (DAR Agusan del Norte/PIA Agusan del Norte)