DAKBAYAN SA BUTUAN -- Padayong gihisgutan sa buhatan ni Kongresista Dale B. Corvera, sa local government unit sa Cabadbaran City ug sa Bureau of Fishery and Aquatic Resources (BFAR) ang mga rekisitos pagpahiluna og fingerlings nursery sa syudad sa Cabadbaran. 

Mahinumdoman nga nagpasaka ang kongresista og balaudnon pagmugna of hatcheries sa syudad sa Cabadbaran (House Bill No. 6689) ug sa lungsod sa Carmen, Agusan del Norte (House Bill No. 6690) niadtong miaging Disyembre alang sa gikinanghlang fingerlings pagpataas sa produksyon sa isda sa Agusan del Norte.

Gipasa kini sa Committee on Aquaculture and Fisheries Resources niadtong Pebrero 22. 

Sa inisyal nga assessment sa BFAR, nakita nga dili haum ang matang sa tubig sa Cabadbaran alang sa hatchery apan gisugyot sa ahensya nga pasado kini kung fingerlings nursery ang himoon ug ang nasangpit nga amendment apil sa himoon sa sunod nga hearing sa kongreso.

Apil usab sa nahisgutan sa tigum ganiha mao ang pagproseso sa pag-angkon sa syudad sa tolo hantod lima ka ektarya nga yuta alang sa maong proyekto. 

Ang proseso sa pagpahiluna sa maong proyekto mao nga mo-komiter ang LGU og luna sa yuta alang niini unya tun-an kung haum ba kini alang sa maong proyekto. Kung haum, himoan kini og pre-feasibility study. Kung mopasar kini sa pagtuon, ipatuman sa BFAR ang proyekto ug i-turn over kini sa LGU human ang duha ka tuig. 

And balaudnon nga gipasaka ni Corvera mao unya ang basehan aron gahinan sa nasudnong panggamhanan ang proyekto og mga P30 milyones nga budget.

Sa panagtigum nga gihimo sa miaging semana, gipadayag ni Mayor Judy Chin Amante sa Cabadbaran nga abli siya nga mopalit ang syudad og yuta alang sa proyekto kung makita nga viable kini.

Sa initial nga pagtuon sa BFAR, nakita nga financially viable kini.

Nasabutan sa maong tigum nga himoon sa LGU ug sa BFAR ang ocular inspection sa mga luna nga posibleng magamit sa proyekto. (Agusan del Norte 2nd District Congressional Office/PIA Agusan del Norte)