LAS NIEVES, Agusan del Norte -- Gitambongan sa 25 ka mga partisipante sa orientation sa para sa shielded metal arc welding (SMAW) NC II Training.
Ang maong aktibidad gipasiugdahan sa Technical Education and Skills Development Authority ubos sa ilang Training for Work Scholarship Program (TWSP).
Gihimo kini kaabag ang lokal nga panggamhanan sa Las Nieves pinaagi sa Las Nieves Training Center (LNTC) nga mao ang implementing arm sa TESDA sa lungsod.
“Dako gyud akong pasalamat kang Mayor Karen Rosales nga napadayon kining SMAW NC II training ug unta magpadayon pa kini pinaagi sa iyang suporta.” Pahayag ni Norberto Ablen, ang LNTC administrator.
Ang SMAW isa lamang sa pipila ka mga skills training nga gipaningkamotan sa LNTC nga ma-implementar.
Pinasubay kini sa executive agenda ni Mayor Karen Rosales nga mapalawig ang kapas sa katawhan sa lungsod nga makatabang sa ilang panginabuhian.
“Nalipay ko nga isa ko sa nakaapil ani nga training kay gusto gyud ko makatoon sa SMAW,” pahayag ni Michael Ablen, isa sa mga trainees.
“Nagpasalamat ako kay mayor ani nga opportunity ug sa LNTC ug TESDA sa ilang pag accommodate kanamo.” pahayag usab ni Rochel Tampos.
Ang orientation gipangunahan ni Pritzel Justo Bucong, ang TESDA scholarship focal sa provincial office sa Agusan Del Norte.
Ang maong panagtigom gipahigayon kaniadtong April 24, sa Las Nieves Training Center. (LGU Las Nieves, Agusan del Norte/PIA Agusan del Norte)
