DAKBAYAN SA BUTUAN -- Human sa sunod-sunod nga konsultasyon, ang Department of Agriculture-Caraga pinaagi sa Planning Monitoring and Evaluation Division o PMED nanguna sa gipahigayon nga Review and Critiquing sa unang Draft sa Commodity Industry Roadmap sa Dakbayan sa Butuan City sugod May 4 hangtod 5, 2023, alang sa unang batch sa mga commodites.
Gibutyag ni Josefa Gidacan, hepe sa PMED, nga mokabat sa napulo ka mga industry roadmap ang nakahilira aron ipresentar ug rebyuhon sa mga partisipante.
Tumong sa maong kalihukan nga mangalap og mga suhestyon aron mas mapanindot pa gikan sa mga dinapit sama sa mga farmer leader, academe, private sector, ug uban pang ahensiya sa kagamhanan.
Gipasabot ni Farmer-Director Christopher H. Lindo nga ang roadmap usa ka mahinungdanong dokumento sanglit magasilbi kini nga giya o reperensya sa direksyon nga paingnan aron makab-ot ang gitingtuha sa matag agricultural commodity.
Giawhag usab ni Regional Technical Director for Research, Regulations, and Integrated Laboratories Abel F. Wagas ang mga partisipante sa pagtan-aw sa roadmap pinasikad sa siyensya nga pamaagi.
Ang unang batch sa mga commodity nga ipresentar mao ang humay, mais, balanghoy, soybean, swine, ug poultry, samtang ang second batch nga gitakda karong Mayo 11 hangtod 12, 2023 mao ang mangga, saging, lowland nga mga utanon, kape, kakaw, ug guma o rubber. (DA Caraga/PIA Caraga)
