DAKBAYAN SA BUTUAN -- Nakab-ot sa probinsya sa Agusan del Norte ang kinatibuk-ang award sa Agribusiness Support for Promotion and Investments in Regional Exposition (ASPIRE) sa tibuok Caraga Region sa pagpanguna sa Department of Agriculture (DA) Caraga sa nahitabong tulo ka adlaw nga Agri-Fishery Trade Fair niadtong Abril 28-30, 2023 sa Gaisano Mall, Butuan. 

Gidawat sa mga personahe sa Provincial Agriculture’s Office (PAO) ang gitunol nga Certificate of Awards gikan sa nasangpit nga ahensya sa pagpanguna ni DA Caraga Regional Executive Director, Engr. Ricardo M. Onate Jr.

Ang nakuha nga award sa probinsyal nga panggamhanan isip First Place mao ang Best Dressed Booth, Best Male and Female Booth Tender, ug Cooking Contest. Samtang Third Place kini sa Amateur Singing Contest.

Ang ASPIRE nga programa sa DA hugot nga gisuportahan sa administrasyon ni provincial Governor Ma. Angelica Rosedell M. Amante aron mapasigarbo ang mga lokal nga produkto sa probinsya gikan sa mga binhi sa pang-agrikultura.

Usa lamang kini nga lakang nga gibuhat sa probinsya aron maangkon ang gipunting nga mahimong sentro ang probinsya sa Agri-Processing Center sa tibuok rehiyon pag-abot sa tuig 2027. (Karen Decamotan, PLGU Agusan del Norte/PIA Agusan del Norte)