DAKBAYAN SA BUTUAN – Gi-aprobahan na sa Sangguniang Panlalawigan bag-ohay pa lamang ang annual budget nga P1,807,042.83 para sa probinsya sa Agusan del Norte alang sa tuig 2024 sumala sa Provincial Appropriation Ordinance No. 681-2023.
Ikumpara ning tuig 2023, misaka kini ngadto sa 7.4 pursyento dili tungod kay gitas-an ang National Tax Allotment (NTA) nga bahin sa Agusan del Norte, kundi tungod sa pagdako sa kita niini ning kasamtangang tuig nga bunga sa pagpaningkamot sa Provincial Treasurer’s Office nga mosaka ang koleksyon sa probinsya gikan sa buhis ug uban pang sources sa kita sa local government unit (LGU).
Ning tuiga, 84 pursyento ang NTA sa badyet, apan tungod sa misaka nga kita sa probinsya, 82 pursyento na lang ang pagka-dependent niini sa NTA. Samtang 18 pursyento niini ang nagrepresenta sa kita sa probinsya kumpara sa 16 pursyento lamang sa miaging tuig.
Gilangkoban sa kita sa probinsya ang tax revenue nga 57 pursyento ug 38 pursyento sa real property tax. Sa kita sa mga ospital niini, mikabat kini sa 62 pursyento ug 38 pursyento sa other receipts.
Ang kinatibuk-ang badyet, bahin-bahinon alang sa mga galastoson sa probinsya sama sa social services nga 41 pursyento nga naglangkob sa health ug nutrition, hospital operations, education, culture ug uban pa; general administrative services nga 34 pursyento diin alang sa general administration, executive and legislative services, fiscal management, ug loan amortizations; economic development services nga 25 pursyento nga naglangkob sa mga programa sa agrikultura, produksyon sa bugas, lakip ang pagpaayo sa mga kalsada, environmental management, ug uban pa.
Samtang sa laing bahin, luyo sa pagkunhod sa NTA sa probinsya ning tuiga, nahimo gihapon sa panggamhanang probinsyal nga ihatag sa mga trabahante niini ang angayan nga mga benepisyo alang kanila. Gani ang collective negotiation agreement (CNA) nga P25 milyon sa miaging tuig mas midako pa kini rong tuiga ngadto sa P30 milyon.
Kini usa lamang sa mga madawat nga benepisyo sa mga opisyales ug empleyado nga siguradong malipayon ang ilang Pasko ug bag-ong tuig. Gani lakip usab ang mga job order nga makadawat og benepisyo ning Disyembre. Kining tanan, gisiguro sa administrasyon ni Gob. Angel Amante ug 19th Sangguniang Panlalawigan sa pagpanguna ni Bise Gob. Enrico Corvera nga mahatag sa tanang trabahante niini ang mga benepisyo tungod sa ilang dakong papel sa mga kalampusan nga naangkon sa probinsya ning tuig 2023. (JVDemain, PLGU-Agusan del Norte/PIA-Agusan del Norte)
