CAMIGUIN (PIA)--Mabulokon ang pag-abli sa 43rd Lanzones Festival sa Camiguin pinaagi sa pagpahigayon og parada, Music and Kabog Showdown, Lanzones 'eat all you can,' ug Colors of Camiguin in Circus, October 23.
Human sa duha ka tuig nga limitadong pagsaulog sa kasaulogan tungod sa pandemya, gipahigayon karon ang nagkalain-laing kalihukan sulod sa walo ka adlaw alang sa mga residente ug turista. Hugot pa gihapon ang pagpatuman sa health protocol ug gitugutan lamang makasulod sa festival grounds ang kadtong nakadawat na maski sa unang booster dose pa lang.
"Despite COVID, look at our province now, so many new businesses have opened, tourists and visitors are coming in droves. The DTI recognized us as the fifth Most Competitive Province in the country, ug halos duha ka bulan na ta wala'y kaso sa COVID and indeed today, we begin the festival with zero active COVID cases," saysay ni Gob. Xavier Jesus Romualdo.
Kauban ang mga ahensya, lokal nga pangagamhanan sa probinsya ug munisipyo, tunghaan, pribadong sektor, ug mga organisasyon, gipahigayon ang 'Grand Parade of the Bountiful Harvest of Lanzones' gikan sa Mambajao Central School padulong sa Cong. PPR Tourism and Sports Complex.
Nirampa usab ang mga kandidata sa Mutya sa Buahanan pinaagi sa float competition kung asa migula isip mananaog ang Provincial Government Office.
Sa pag-ila sa dakong tabang sa kabog aron sa pagpadaghan sa produksyon sa Lanzones, bibong nanayaw ang mga kabatan-onan nga giawat ang nawong sa maong mananap sa Music and Kabog Showdown. Nasakmit sa LGU Catarman ang unang ganti sa Kabog Showdown ug LGU Mahinog usab ang nidaog sa Music Showdown.
Sa pag-abli sa Ugmad o pagpakita ug pagbaligya sa mga lokal nga produkto sa isla, nanguna ang mga lokal nga opisyal sa probinsya kauban ang Department of Tourism kon DOT sa libreng pakaon sa Lanzones.
Bibo usab ang pagpakita sa ilang talento ang 13 ka ahensya ug organisasyon sa Opening Salvo nga gibase sa usa ka circus. Nidaog ang Department of Public Works and Highways kon DPWH sa maong indigay.
Ipahigayon usab ang Lanzones Festival Street Dancing karong Sabado ug mahuman ang kasaulogan karong October 30.
