LEGAZPI CITY, ALBAY (PIA) -- Bagamat bumaba na ang presyo ng pulang sibuyas ngayong Pebrero, mabigat pa rin ito sa bulsa ayon sa ilang mamimili at nagtitinda sa Legazpi City public market.

Mula sa P600 kada kilo noong Disyembre, kasalukuyang nasa P300 – P320 kada kilo ang imported at P280 ang lokal na pulang sibuyas.

Si Ate Marie, isa sa mga mamimili, hindi na makabili ng por kilo dahil sa kamahalan nito.

“Tingi-tingi na lang ang nabibili kong sibuyas, P20 tatlong piraso. Hindi lang sibuyas ang mahal, lahat na lang mahal. Sobra nang paghihirap ng pinoy”, saad ni Ate Marie.

Kung dati ay nakapaglalaan pa ng puhunan si Ate Rhoda para sa sibuyas, ngayon ay tinigil niya na muna ang pagbebenta nito. Aniya, hindi kaya ng kagaya niyang maliit na namumuhunan ang capital at demand ng pulang sibuyas.

“Ang puhunan kasi ngayon ng sibuyas, bukod sa mataas, mahina ang bilihan. Wala kaming sapat na puhunan na bumili. Nasa P2,700 ngayon ang sibuyas pero 9kls lang ang laman, malaking puhunan na ‘yan. Nasa tatlo o apat na bag na yan noong nasa P600 – P700 lang dati. Kaya hindi muna ako bumili ng sibuyas,” saad niya.

Panawagan niya rin na bantayan ang hoarding at transportation cost na sa tingin niya ay dahilan ng pagtaas ng presyo.

“Sa TV lang bumababa ang sibuyas. Sinasabi nila na dahil sa transportasyon dahil mataas ang papuntang Bicol. Sinasabi rin nila sa TV na wala naman tayong shortage ng sibuyas pero pag dating sa aktwal ay mahal pa rin,” wika niya.

“Kaya bantayan nila ang nag-hohoard nito. Mura ang kuha sa farmers pero pagdating sa pamilihan mahal pa rin kaya nagsasakripisyo ang maliliit na mamimili,” dagdag niya.

Paubos na lang

Pinapaubos na lamang ng ilang nagtitinda ang kanilang lokal na pulang sibuyas dahil hindi na rin nila kaya ang mataas na puhunan. Isa na dito si Kuya Phil na ibinibenta ang kanyang paninda ng P280 kada kilo.

“Mahal at maputla ang imported na sibuyas. Bumaba man noong Enero na P1,600/bag ngayon, pero mahigit dalawang libo na naman ngayon. Kaya pinapaubos ko na lang sa halagang P280 kada kilo” saad niya.

Duda niya, may mga nagmamanipula ng supply at presyo nito.

“Hanggat may mga negosyanteng humahawak nito, ganyan pa rin ang presyo. Mura ang bili nila pero ang benta nila dito mahal kasi may nag ma-manipulate nito. Iniimbistigahan na rin yan sa senado,” dagdag niya.

Tiwala naman ang tinderong si Tatay Joseph mas bababa ang presyo ng sibuyas ngayong Marso dahil sa harvest time na sa Ilocos at Nueva Ecija na pangunahing pinagkukunan ng lokal na sibuyas. 

Importasyon at makabagong teknolohiya

Pag-angkat ng sibuyas sa ibang bansa at pag-aaral ng makabagong teknolohiya upang makapagtanim ng sibuyas sa iba pang mga lugar ang tugon ng Department of Agriculture (DA) Bicol upang madagdagan ang supply ng sibuyas at mapababa ang presyo nito.

Sa panayam kay DA Bicol Information Officer Lovella Guarin, nagsasagawa na ng trials at demonstration studies upang maiakma ang pagtatanim ng sibuyas sa rehiyon.

Dumating na rin ang mga imported na sibuyas mula sa ibang bansa alinsunod sa direktiba ni Pang. Bongbong Marcos sa layuning mapababa ang presyo nito sa mga pamilihan. (PIA5/Albay/With reports from Christine Joy Bobiles, BU intern)