LEGAZPI CITY, ALBAY (PIA) – Binigyang pugay ng lokal na pamahalaan ng Camalig  ang mga responders sa matgumpay na 13 araw na search, rescue at retrieval operations nitong Lunes, Marso 6, sa Nuyda Park, Camalig, Albay.

Lubos ang pasalamat ni Alkalde Mayor Carlos Irwin “Caloy” Baldo Jr. sa lahat ng tumulong, na kanyang binansagang mga ‘bagong bayani.’

“Hindi magiging successful ang operation na ito kung walang cooperation ng bawat isa,” turan ni Baldo.

Nagpahayag din ng taos-pusong pasasalamat si Energy Development Corporation President and COO Richard Tantoco.

“The team members here today risked their own lives and some were also injured while completing this grueling task. We offer our deep gratitude and sincere thanks to all the various organizations involved in the search, rescue and retrieval operations,” ayon kay Tantoco.

Magnificent 5

Kasama sa mg kinilala ang tinaguriang Magnificent 5 na unang nakarating sa matarik at mapanganib na crash site na 350 meters na lamang ang layo mula sa crater ng Bulkang Mayon.

Sila ang mga residente ng Brgy. Anoling sa Camalig na sina Jose Obal, Marjames Mariñas, Orly Nantes, Gerry Nodalo at ang 68-anyos na si Roger Villanueva.

“Naisipan lang naming umakyat kasi may mga usap-usapan kaming narinig na may buhay pa daw na dalawa sa taas kaya pinursige namin,” ani Nodalo.

Dahil mas kabisado nila ang daanan patungo sa crash site, sila ang naging gabay ng mga responders alinsunod na rin sa direktiba ni Incident Commander at Camalig Mayor Baldo. 

Matarik, mabato, madulas at walang makita sa daraanan papunta sa crash site dahil sa patuloy na sama ng panahon.

"Isang maling galaw lamang at maaring bumagsak sa malalim na gulley ng Mayon," saad ni Nodalo.

Tiger of Mayon

Kasama sa mga nangunang Albayano volunteers na sumuong sa panganib na ito si George Cordovilla, ang tinaguriang Tiger of Mayon dahil sa mahigit 300 beses na pag-akyat sa bulkan. Kasama rin siya sa mga survivors na inabot ng phreatic eruption noong 2013.

Si Cordovilla, edad 62, ang team leader ng Albay Climbing Community.

Aniya, sa kabila ng kasanayan at kaalaman sa terrain, nakaambang muli ang panganib ng phreatic eruption.

“Syempre may takot kasi alert level 2 yung bulkan. So anytime kasi umuulan, pwede mag-phreatic (eruption). Na-experience ko na ‘yan nung May 7, 2013. Ako yung guide nung mga taga-Thailand. May mga casualties din,” ani Cordovilla.

May mga pagkakataon din na kailangan nilang agahan ang cut-off time ng operasyon upang magtayo ng pansamantalang campsite.

“For example, three o’clock cut-off time kasi walang established campsite, gagawa ka pa. So kami, naka-establish kami ng camp, pero tarpaulin lang kasi magaan. Kasi kung tent, medyo mabigat dalhin,” dagdag niya.

Aniya, isang malaking karangalan na sa wakas ay nakilala rin ang kanilang grupo.

“It’s an honor for the group na na-recognize finally kasi marami na kaming rescue operations na nagawa. Ngayon lang talaga kami na-recognize.”

Nag-iisang babae

Binigyan din ng natatanging pagkilala si F02 Maria Salve Buiza ng Bureau of Fire Protection Region 5 Special Rescue Force, ang nag-iisang babae na sumama sa pagsuong sa hamon at panganib na maibaba ang katawan ng apat na biktima.

“Kung anong kaya ng lalaki kaya din ng babae basta yung mindset natin nakatuon sa goal, at yun ay ang maibalik ang mga biktima sa pamilya nila,” saad ni FO1

“Actually, nag-volunteer ako sumama at buti na lang pinayagan ako. Tsaka lahat kami tumitingin sa safety ng bawat isa,” dagdag niya.

Kasama sa pinarangalan ang mga responders mula sa Albay Climbing Community, Mayon Mountaineers, Federation of Bicol Mountaineers Inc., Mountaineering Federation of the Philippines Inc., Wilderness Search and Rescue (WISAR), Naval Special Operations Group (NAVSOG), Bureau of Fire Protection (BFP), Philippine National Police (PNP), Philippine Army, Energy Development Corporation (EDC), Armed Forces of the Philippines (AFP), Philippine Air Force (PAF), Philippine Navy, at iba pang volunteers, partners at mga ahensiya na nakibahagi sa operasyon. (With reports from Ann Jubelle De Vera/Judith Valenzuela/PIA5/Albay)