LUNGSOD NG BATANGAS (PIA) --Muling inilunsad ng Batangas Police Provincial Office (BPPO) ang Kabataan Kontra Droga at Terorismo (KKDAT) sa lalawigan ng Batangas na ginanao sa Camp Miguel Malvar Hunyo 22.

May temang “Kabataang Bagani, Bagong Bayani” layon nitong maisulong ang pagpapalakas ng puwersa ng mg akabataan upang malabanan ang illegal na droga at terorismo kung saan sila mismo ang kauna-unahang nagiging biktima.

Nagsilbing panauhing pandangal sina KKDAT/Police Community Affairs and Development Group Adviser Maru Soriano, KKDAT National Spokesperson Franz Liam Arabia at KKDAT  Regional President Rolden Garcia sa naturang programa.

Binigyang-diin ni Garcia na nananatiling ang mga kabataan pa rin ang pag-asa ng bayan kaya’t malaki ang gampanin ng mga Sangguniang Kabataan (SK) officials upang maipaalam sa kanilang hanay ang KKDAT at ang layunin nito.

Sinabi naman ni Soriano na isa sa isyung kinakaharap ng pagpapatupad ng KKDAT kung paano masusustina ang programa kung kaya’t malaki ang gampanin ng mga SK officials upang ito ay mapalaganap at maipaunawa sa mga kabataan ang kahalagahan na mapalakas ang kampanya kontra droga at terorismo.

“Noong unang inilunsad ang programa noong 2019 ito ay ipinagkatiwala sa SK upang maipatupad at makagawa ng mga proyekto para sa mga kabataan at kailangan nito ng pondo.

 Ang pangunahing layunin nito ay upang ma-educate ang mga kabataan kung paano sila iiwas sa paggamit ng illegal na droga at kung saan sila dapat pumanig sa pamahalaan o sa lumalaban sa pamahalaan,”ani Soriano.

Samantala, binigyang-diin naman ni Arabia na sa loob ng 51 taon ay hindi nabigyan ng kasagutan ang isinisigaw na karapatan at demokrasya sa pamamagitan ng rebolusyon at armadong pakikibaka.

Aniya, ang mga katuruang ito ay kailanman hindi nagkaroon ng katuturan kung kaya’t dapat hindi maloko ang publiko lalo’t higit ang mga kabataan.

Ayon kay PCol. Glicerio Cansilao, ang pagkakataong ito ay tunay na makabuluhan upang pukawin ang puso at isipan ng mga kabataan upang hindi sila  malihis ng landas at maakit ng matatamis na salita upang maiiwas sila sa anumang kapahamakan.

Nauna na dito ay sabay sabay na inilunsad ang KKDAT sa lahat ng bayan at lungsod noong ika-18 ng Hunyo katuwang ang mga police stations sa 34 bayan at lungsod sa lalawigan.

Ang KKDAT ay bahagi ng proactive response ng Philippine National Police kaugnay ng hangarin ni Pagulong Rodrigo Duterte na malinis ang bansa sa illegal na droga at terorismo. Ang paglulunsad ay nilahukan ng mga SK Federation President ng mga bayan at lungsod sa lalawigan gayundin ang 34 na police stations dito. (BHABY P. DE CASTRO/PIA-Batangas)