TAGBILARAN CITY, Bohol, July 6 (PIA) -- Gipahimangno-an ang mga kapulisan sa ilang labaw nga magbantay sa mga tawo nga mapahimuslanon sa gipaluag nga lagda sa interzonal travel alang sa mga hingpit nga nabakunahan kay mahimong maoy maggamit sa peke nga card sa pagbakuna.

Matud ni Philippine National Police chief Gen. Guillermo Eleazar sa kapulisan nga makigsabot sa local government units sa bag-ong direktiba nga gi-isyo sa Inter-Agency Task Force for the Management of Emerging Infectious Disease (IATF-EID) nga ang nabakunahan, dili na magpakita sa swab test result kung mo byahe.

Sa bag-ong resolusyon sa IATF, gi-isip na sa IATF ang tawo nga nabakunahan na kon may duha na ka semana o labaw pa ang milabay human sa iyang pagtupok sa ikaduhang bakuna o duha ka semana sukad nakadawat sa single shot.

Alang sa interzonal travel gitugotan ubos sa gipatuman nga “resolution” sa IATF, ang pagpresentar sa vaccination card isipon na nga hulip sa testing requirements nga kinahanglanon sa lokal nga gobyerno.

Niini, magamit usab kini sa senior citizen nga nabakunahan na.

Hinuon, bisan pa sa ikapakita nga vaccination card, ang traveler kinahanglan ipaubos sa health and exposure screening sa iyang pag-abot sa local government nga padulngan.

Dungan usab niini, gipahinumduman ni Eleazar ang publiko sa kanunay gayud nga pagsubay sa minimum public health safety standards bisan kung nagbyahe ug nabakunahan na. (Analyn Socobos/PIA Bohol)