TAGBILARAN CITY, Bohol, July 6 (PIA) -- Gihimakak sa Department of Health (DOH) ang pasangil nga kini nagpalit og padulong na mohupas nga mga tambal, diin gipasangil nga kini nagsupak sa bala-od.

Matod pa ni Health Undersecretary Maria Rosario Vergeire sa usa ka online nga tigum, nga dili mahitabo nga mamalit sila sa mga hapit na mahupas nga tambal, kay sila nagsunod sa mga patakaran ug bala-od sa goberno.

Kalabot niini, iyang gipahayag nga aduna usab silay protocols ug mga ahensya sa goberno nga naghatag og bala-od nga dili sila pwede mamalit sa mga padung mahupas nga mga tambal.

Niini, giingon ni Vergeire nga base sa gisunod nila palisiya mahimo ra sila makapamalit og tambal nga epektibo gikan sa 18 hangtod 24 ka buwan.

Dugang pa niya, nga aduna usab silay mga palisiya nga gehagatag sa goberno nga kung adunay dinalian nga panginahanglan ang publiko mahimo silang makapalit sa giingon nga tambal, o supply nga adunay kaepektibo nga moabut sa 12 ka bulan, kay kini kinahanglanon sa nasud.

Sa laing bahin, giingon sa opisyal nga naghulat pa sila sa mga dokumento ug mga dugang pangutana gikan ni Senador Manny Pacquiao, aron mahimo nila nga mahatagan og solusyon ang maong pasangil. (RAHC/PIA Bohol/Mae Ann Grace C. Rubia)