TAGBILARAN CITY, Bohol, July 6 (PIA) -- Nanawagan ang Philippine Red Cross (PRC) sa mga nangaayo na sa coronavirus disease (COVID-19) nga mohatag og plasma taliwala sa presensya sa Delta variant sa nasud.

Ang PRC niadtong Lunes, Hulyo 5, subay sa kampanya alang sa Blood Donation Month karon nga bulan, nag-awhag pinaagi ni Chairman ug Chief Executive Officer (CEO) Richard J. Gordon sa mga naayo na sa COVID-19 nga hingpit nang nabakunahan nga mohatag og plasma samtang nag-atubang ang nasud sa presensya sa Delta variant.

Dugang pa sa PRC, ang blood plasma nga gihatag sa mga nakalingkawas sa COVID-19 kasagaran adunay taas nga lebel sa COVID-19 antibodies.

Ang convalescent plasma mahimong ihatag sa mga adunay COVID-19 aron mapadako ang ilang kapasidad sa lawas sa pakig-away batok sa COVID-19.

Matod pa usab sa PRC nga ang paghatag og dugo magbabilin gihapon nga mahinungdanon bisan pa sa mga hagit sa COVID-19 pandemic.

Ang PRC nagpahinumdom usab sa mga posibleng donors nga kinahanglang himsog sila kun mohatag og dugo, busa kadtong mga tawo nga nakasinati sa mga epekto gikan sa bakuna kinahanglan maghulat hangtud nga ang ilang simtomas mamaayo.

Niadtong Dominggo lamang, Hulyo 4, ang PRC nakadawat og 444 plasma donors.

Alang sa mga interesado nga mohatag og dugo, mahimo sila mokontak sa PRC National Blood Center o sa kinaduolan nga PRC Chapter sa ilang mga lugar. (RAHC/John Paul Elicano, PIA Bohol intern)