TAGBILARAN CITY, Bohol, July 8 (PIA) – Nangahatag na ang Lungsod sa Getafe og Hazard pay alang sa mga barangay frontliners karong adlawa.

"Mapasalamaton ang atong lungsod sa mga sakripisyo ug abag nga gihatag sa mga frontliners niining panahon sa gisagubang nga pandemya karon, lakip na niini ang pagtuman sa mga tagsa-tagsa ka opisyal nga buluhaton matag barangay taliwala sa pagtubag sa pandemya," matud ni Mayor Casey Shaun Camacho.

Ang pagtunol sa hazard pay gipangunahan sa opisyales sa lungsod uban ni Mayor Camacho, Vice Mayor Eduardo Torremocha, SB Members, ug ABC President Cary Camacho, nga nagtimaan sa ilang kanunay nga pagsuporta sa mga frontliners sukad nagsugod ang pandemya nga Covid-19.

Nagpasalamat usab ang Lungsod sa Department of Health sa paghatag ug pundo nga gigahin alang sa barangay frontliners sa ilang mga sakripisyo nga gibuhat aron mapugngan ang pagkaylap sa sakit.

“Kini nagpamatuod nga ang mga barangay frontliners dako ug tabang ilabi na sa pandemya nga atong giatubang karon maong angay nga hatagan sila og tugbang segun sa ilang trabaho,” matud sa mayor. (RAHC/Analyn Y. Socobos)