VALENCIA CITY (PIA)—Agi'g tubag sa panawagan sa Nationwide Diskwento Caravan sa Department of Trade and Industry (DTI), ang DTI-Bukidnon, kauban ang Valencia City Chamber of Commerce and Industry (VCCCI) ug ang Valencia LGU nagpahigayon ug Diskwento Caravan sa Valencia City Gymnasium, Hulyo 8.
Ubos sa temang "Diskwento Caravan: Alay sa mga Konsyumers na Nagpabakuna," tumong niini nga padayon ang pagbaligya ug mga produkto ngadto sa publiko pinaagi sa paghatag ugdiskwento sa presyo labi na karon panahon sa pandemya.
Si Eriberto A. Taban-ud, Jr, ang provincial director sa DTI Bukidnon miingon nga ang makapahimulos sa kalihukan mao ang mga konsumante nga nahuman na sa pagpabakuna alang sa proteksyon sa COVID-19.
“Ang atong mga benepisyaryo niini kadto lamang atong mga kaigso-onan nga duna nay mga ‘Vaccine Card.’ Bisan pa ug ‘first-dose’ nga bakuna pa lang ang nakabutang sa card, pwede na maka-avail sa ‘Diskwento’. Pinaagi niini nga kalihukan, atong matabangan ang gobyerno sa pagdasig sa katawhan nga magpabakuna gyud,” dugang ni Taban-ud.
Tungod niini, dako ang pasalamat ni Valencia City mayor Azucena P. Huervas ngadto sa DTI Bukidnon ug Valencia City Chamber sa pag-organisar sa kalihokan. Matud niya nga usa kini ka inisyatiba nga dako ug tabang sa syudad aron daghan pa ang makumbinsi nga magpabakuna.
“Akong gi-awhag ang atong katawhan nga atong ipamalita ngadto sa atong mga silingan, mga higala, ug pamilya kung unsa ka-importante ang pagpabakuna. Atong i-spread ang good news nga maka-avail kita sa mga ‘Diskwento’ ug ‘Freebies’ gikan sa mga kompanyang lakip sa ‘Caravan’ kon kita ‘vaccine cardholder’ na,” matud sa mayor.
Sa samang higayon, mipasalamat ug dako si DTI Provincial Director Eriberto A. Taban-ud, Jr., ngadto sa Valencia Chamber ug sa Valencia City Government tungod sa suporta sa mga programa sa DTI. Gipadangat usab niya ang iyang dakong pasalamat sa tanang kompanya nga misalmot sa Diskwento Caravan ug pagbaligya sa labing barato nga presyo atol sa gipahigayong caravan.
Atol sa kalihukan, gipirmahan sa DTI ug Valencia Chamber ang usa ka Memorandum of Agreement aron ma renew ang commitment sa duha ka organisasyon nga magtinabangay sa matag usa sa pagpadagan sa lain-laing kalihokan nga dunay kalabutan sa Consumers welfare; Safety and quality of consumer goods and services; Consumer redress mechanism; ug Establishment and maintenance of standards in ethical business practices. (BGE/PIA-Bukidnon)
